Կառավարության դիմաց այսօր հավաքվել էին  տեղահանված արցախցիները։

Նրանք ցանկանում են հանդիպել վարչապետ Նիկոլ Փաշինյանի հետ՝ հասկանալու՝ ինչ է լինելու իրենց բնակեցման հարցը, որքան են շարունակելու ապրել, իրենց բառերով,  փոքրիկ խցերում կամ բազմամարդ սենյակներում ու հանրակացարաններում։

Ակցիայի մասնակիցները մի քանի անգամ շեշտեցին, որ իրենց ակցիան քաղաքական չէ։ Ցանկանում են միայն աջակցություն ստանալ։ Արցախի Քաշաթաղի շրջանի բնակիչներից մեկն էլ նշեց, որ հյուրանոցից, որտեղ իրենք այժմ ապրում են, ցանկանում են իրենց դուրս հանել, իսկ իրենք գնալու տեղ չունեն։

Տուն նրանք ցանկանում են Հայաստանո՞ւմ, թե՞ Արցախում, Քաշաթաղ համայնքի վարչակազմի ղեկավարի օգնական Ինա Բաբայանը նշեց՝  շատերը վախենում են հետ վերադառնալ Արցախ․ չկա անվտանգության երաշխիք․

«Մենք բնավ չենք ուզում միշտ ստանալ գումարային օգնություն պետությունից։ Եթե մեզ տան բնակության վայր, տուն, մենք պատրաստ ենք աշխատել, արարել և ապրել արժանավայել», - ասաց նա։