«Ճիշտ քաղաքականության դեպքում այս պատերազմը կարող էր լինել ոչ թե հիմա, այլ միգուցե ավելի ուշ»,-այս մասին այսօր մտավորականների և մշակույթի գործիչների հետ հանդիպմանն ասաց 17 ուժերի վարչապետի թեկնածու  Վազգեն Մանուկյանը:

Նրա խոսքով՝ մենք տապալել ենք բանակցությունները հակառակորդի հետ․«Նրան գրգռեցինք ու մտցրեցինք պատերազմ»,-նշում է ընդդիմության վարչապետի թեկնածուն։

 

Ըստ Վազգեն Մանուկյանի՝ պատերազմի օրերին Ադրբեջանն էլ էր սպառվում ու ցանկանում կանգնեցնել գործողությունները, որովհետև ինքն էլ չէր կարողանում շարունակել։

Նրա խոսքով՝ եթե մենք ունենայինք նորմալ ղեկավար, շատ մեծ քաղաքական առևտուր կարող էինք անել ու բանակցությունների միջոցով փաստաթուղթը կփոխվեր․ «Բնական է, որ ցանկացած պատերազմից հետո պարտված ղեկավարը հեռանում է․ մարդիկ կան հեռանում են, մարդիկ կան ինքնասպանություն են գործում, մարդիկ կան, հեռացվում են»,- ասում է Վազգեն Մանուկյանն ու նշում՝ պատերազմի հետևանքների վերացումը և ոտքի կանգնելը կսկսվի այն պահից, երբ Նիկոլ Փաշինյանը կգնա։ 

 

Նա նաև ներկայացնում է, թե Նիկոլ Փաշինյանի հրաժարականից հետո որոնք պետք է լինեն անցումային կառավարության անելիքները․ «Դրանից հետո մենք կունենանք շատ ծանր ժամանակաշրջան, որը դրված է այդ անցումային կառավարության վրա՝ պայմանագրերի մեկնաբանություն, փախստականներ, գերիներ, անհայտ կորածներ․ բազմաթիվ այսպիսի հարցեր կա, որոնք պետք է լուծվեն այդ անցումային կառավարության միջոցով»,-ներկայացրեց նա։

 

Նրա խոսքով՝ անցումային ժամանակաշրջանից հետո լինելու է նոր փուլ, որտեղ տեղավորվելու են հներ, նորեր, նրանք, ովքեր կարող են իրենց հայրենիքին օգուտ բերել։ Վազգեն Մանուկյանի ելույթից հետո մտավորականները հարցեր ուղեցին վարչապետի թեկնածուին։

 

Երգչուհի Շուշան Պետրոսյանը, անդրադառնալով Ն․ Փաշինյանի հայտարարությանը՝ եռօրյա սուգ հայտարարելուն ու երթ ունենալուն, նշեց, որ Փաշինյանը երթին մասնակցողներին կներկայացնի որպես իր համախոհների, ի՞նչ տարբերակ ու ելք ունեն, որպեսզի բոլոր փակ աչքերը բացվեն։ Նրա խոսքով՝ հիմա բարեկիրթ լինելու ժամանակը չէ․ «Երկրի հերն անիծել է այդ տղան, Պարոն Մանուկյան, ինչքա՞ն են շարունակվելու այդ բարեկիրթ հավաքները»,-ասաց նա։

 

Վազգեն Մանուկյանի խոսքով՝ ինչ զգացմունք էլ ունենա ինքը, իրեն երբեք թույլ չի տա Նիկոլ Փաշինյանի հետ նույն շարասյունով քայլել։ 

Շուշան Պետրոսյանը առաջարկեց առանձին երթ կազմակերպել։