«Կոչ՝ բարեկամական երկրին». խաղաղ հավաք Վրաստանի դեսպանատան դիմաց (տեսանյութ)
Աջակցիր «Ա1+»-ինՎրաստանի դեսպանատան մոտ այսօր հավաքվել էին մի խումբ քաղաքացիներ, ովքեր նամակ փոխանցեցին Վրաստանի դեսպանատանը, որում կոչ էին անում հարևան երկրին թույլ չտալ Ադրբեջանին իր տարածքով անցկացնել զենքեր և վարձկաններ․
«Ադրբեջանական և թուրքական կողմերը շարունակում են օդային ճանապարհով քաղաքացիական օգնության տակ անցկացնել զենքեր, որոնք հետագայում օգտագործվում են Արցախի և Հայաստանի քաղաքացիական բնակչության դեմ»,-ասում է հավաքի մասնակիցներից Գարիկ Սարգսյանը և հավելում, որ թեև Վրաստանը գիտակցում է տարածաշրջանում խաղաղության պահպանման կարևորությունը, այնուամենայնիվ՝ վեր է դասում իր տնտեսական շահը․ «Վրաստանը ևս գտնվում է Թուրքիայի և Ադրբեջանի արանքում, և թե՛ ադրբեջանական, թե՛ թուրքական, թե՛ հայկական կողմը բավականին ուժեղ նպաստում ենք Վրաստանի տնտեսությանը, այսինքն՝ դեմ գնալ մեզնից ցանկացածին, նշանակում է՝ ունենալ տնտեսական մեծ կորուստներ, կարծում եմ՝ սա է պատճառը, որ նրանք վախենում են գործել»։
Սարգսյանը համոզված է՝ Հայաստանից հետո հաջորդ թիրախում լինելու են Վրաստանը և Իրանը։ Հավաքի մասնակիցները շեշտեցին՝ դեսպանատան մոտ հավաքվել են բարեկամական երկրին իրենց կոչը ուղղելու, և Վրաստանը շարունակում է մնալ մեր հազարամյա բարեկամ երկիրը․
«Այս պահին Հայաստանը միայնակ պայքարում է միջազգային տեռորիզմի դեմ, և այս հարցում Ադրբեջանը ստանում է օգնությունը Թուրքիայի, որը երբեմն անցնում է Վրաստանի օդային տարածքով։ Եթե մեր այսօրվա ակցիայի արդյունքում այս միտքը հասնի Թբիլիսի, կհամարենք, որ մեր նպատակին հասել ենք»։
