Մեր վիրավոր զինվորների և խաղաղ բնակչության վիճակը գտնվում է հայկական երկու պետությունների բժշկական համակարգերի հոգատարության ներքո։ Այս մասին այսօր Արցախում հրավիրված ասուլիսում հայտարարեց Առողջապահության նախկին նախարար Արմեն Մուրադյանը։

Մուրադյանն այնուհետև խոսեց ռուսերենով, ասաց' ուզում է իր ուղերձը աշխարհին և ադրբեջանցիներին հասանելի լինի։ Վերջինս պնդեց' արցախցին ապրել է և ապրելու է իր հողի վրա, հորդորեց' բոլորին նայել սեփական հողի վրա հարձակման ենթարկվող ժողովրդի, երեխաների աչքերին և պարզ կդառնա' ով է հրահրում ագրեսիան, այն դեպքում, երբ համաշխարհային պանդեմիա է։

Մուրադյանը նշեց' այն վնասվածքները, որ տեսնում ենք, դուրս են մարդկային և մարդասիրական նորմերից, կան զենքեր, որոնց կիրառումը անմարդկային բնույթ է կրում։

Վստահեցրեց, որ այսօր մեր բժշկական համակարգը ի վիճակի է լայնածավալ օգնություն ցուցաբերել և մեր վիրավորներին, և այն ադրբեջանցիներին, ովքեր խաբված հայտնվել են կրակի տակ և ստացել վիրավորումներ։

Մուրադյանը հավելեց, որ վիրավորների հետ աշխատում են նաեւ հոգեբաններ, հաշվի առնելով այն պայթյունները, որոնք տեսել են նրանք։