Փորձում են անլեգալ կերպով կենդանիներ բերել կենդանաբանական այգի․ բնապահպան
Աջակցիր «Ա1+»-ինՕրեր առաջ Երևանի կենդանաբանական այգին պաշտոնական հայտարարություն տարածեց այն մասին, որ այգում հայտարարվում է կարանտին, և մոտակա մեկ ամսվա ընթացքում այցելուների մուտքը արգելվում է. պատճառը տուբերկուլոզ հիվանդության առկայությունն է անկում ապրած ուղտի մոտ։
«Թռչնասերների կենտրոն» ՀԿ տնօրեն, բնապահպան Սիլվա Ադամյանը կարծում է, որ Երեւանի կենդանաբանական այգու խնդիրներին լուծում չի տրվում։
«Լուրջ խնդիրներ ծագեցին վերջին մեկ տարվա ընթացքում՝ կենդանաբանական այգու և կենդանիների անկման հետ կապված, սակայն լուրջ ընթացք այդ անկման հետ կապված չտրվեց։ Խնդիրները շարունակվում են և շարունակական են լինելու»,- նշում է Սիլվա Ադամյանը
Սիլվա Ադամյանը նշեց, որ փորձում են անլեգալ կերպով կենդանիներ բերել Երևանի կենդանաբանական այգի, և անդրադարձավ այդ խնդրին ևս։
«Մենք տվյալներ ենք ստացել՝ ժամանակին կենդանաբանական այգու տնօրինությունը զապռոս է ուղարկել՝ կարմիր պանդա ձեռք բերելու համար, բայց Մոսկվայի կենդանաբանական այգին մերժել է, որովհետև մեր կենդանաբանական այգին ի վիճակի չէ կարմիր պանդային պահել։ Հիմա նոր տնօրինությունը նորից փորձում է կապ հաստատել և խնդիրների լուծել և ես կարծում եմ, որ կարմիր պանդային կբերեն անլեգալ ճանապարհով»,- հայտնում է Սիլվա Ադամյանը։
Կենդանիների առողջական կարգավիճակին անդրադարձ կատարեց և կարանտինային իրավիճակի մասին մանրամասնեց Սննդամթերքի անվտանգության պետական ծառայության առաջին պետ Գրիգոր Գրիգորյանը։
«Տուբերկուլոզի հետ կապված խնդիրը բարձրացրել եմ մեկ ու կես, մեկ տարի առաջ, քանի որ այգում գործում է ստացիոնար տուբերկուլիոզի օջախ, այգում չեն կատարվում աշխատանքներ այգու կենդանիների և այցելուների համար»,- հայտնում է Գրիգոր Գրիգորյանը։
Ուղտի անկումը եղել է հունվարի 30-ին, բայց այգում կարանտին է հայտարարվել փետրվարի 5-ին, և այդ ընթացքում այգին այցելուներ է ունեցել։
