Նորաշենի բնակիչները պահանջում են վերականգնել իր պաշտոնում նախկին համայնքապետին (տեսանյութ)

Արարատի մարզի Նորաշեն համայնքի բնակիչները Կառավարության շենքի դիմաց են։ Նրանք պահանջում են վերականգնել արդեն նախկին համայնքապետ Նորայր Գրիգորյանին իր պաշտոնում։ Պնդում են, որ Արարատի մարզպետը նրան պաշտոնանկ է արել անօրինական կերպով, հաշվի չառնելով համայնքի կարծիքը, երբ համայնքապետը արձակուրդի մեջ էր։ 

«Այստեղ գնում է անձնական խնդիր պարոն Գրիգորյանի և Սարգսյանի միջև։ Ինքն իր կողմից նշանակել էր ժամանակավոր պաշտոնակատար Արտակ Հարությունյանին, որին մենք դեմ ենք։ Հիմա գյուղը բաժանվել է 2 մասի, 4-5 օր է արդեն՝ համայնքապետարանը չի գործում։ Մենք ունենք խնդիրներ, որոնք պետք է լուծվեն, բայց դա չի հուզում Գարիկ Սարգսյանին։ Իր կապրիզն է․ ինքը նշանակել է Արտակ Հարությունյանին և ուզում է, որ ամբողջ համայնքը իր այդ  ավագանու 4 անդամների ցանկությունը կատարի»,- պնդում է ակցիայի մասնակիցներից մեկը։

Համայնքի բնակիչները պնդում են, որ ավագանու նիստը, որով կայացվել է որոշումը, պատշաճ կերպով տեղի չի ունեցել։ 9 անդամներից նիստի ներկա են եղել միայն չորսը․ մյուս հինգից մեկն ԱՄՆ-ում է, իսկ չորսը նույնիսկ տեղյակ չեն եղել նիստի մասին։

«Մարզպետարանից հարցրեք՝ ցույց տուր ավագանու նիստի արձանագրությունը։ Այս ամեն ինչի հիմքը մի թուղթ է՝ ավագանու նիստի արձանագրություն, չկա նման բան։ 4 հոգով 2 տարվա գյուղապե՞տ ենք հանում։ Նորայր Գրիգորյանը մինչ այս շիլաշփոթը շուրջ 6 ամիս ներկայացրել է մարզպետին, որ ավագանու անդամները բոյկոտում են նիստերը կամ ուղղակի չեն ներկայանում»,- նշում է Արարատի մարզի բնակիչ, «Ուժ և իրավունք» հկ նախագահ Ալինա Մախսուդյանը։