Հայաստանում պատրաստել են 20 մետրանոց «խաղաղության բրդուճ»-ը (լուսանկարներ)
Աջակցիր «Ա1+»-ինՏավուշի մարզի Ենոքավան գյուղում՝ «Ապագա ռեզորթ»-ի տարածքում, արդեն 5-րդ տարին անց է կացվում «ՀայԲույս» փառատոնը՝ նվիրված հայկական բուսատեսակներին:
Մասնակիցների թիվը տարեցտարի ավելանում է. այս տարի նրանք 700-ից ավելի են:
Փառատոնի մասնակից արտադրողների տաղավարներից յուրաքանչյուրում ներկայացված էր հայկական բուսատեսակներից իրենց սեփական արտադրանքը՝ «Made in Armenia» գրառմամբ՝ խոտաբույսերով թեյերից մինչև ձեռագործ զարդեր և տեղական ֆասթֆուդ:
Յուրաքանչյուր տարի փառատոնն ավարտվում է արդեն ավանդական դարձած «խաղաղության բրդուճ»-ի պատրաստմամբ: Ամեն ինչ հայկական ձևով՝ լավաշ, տարատեսակ պանիրներ և կանաչեղենի առատ տեսականի: Բրդուճն ամեն տարի երկարում է՝ այս տարի դրա երկարությունը հասում էր 20 մետրի:
Տավուշի մարզի թեմի առաջնորդ Բագրատ Սրբազանը հորդորեց տաղավարների կողքով անցնելիս «լայն բացել գրպանն ու հոգին՝ գնումներով խրախուսելով տեղական արտադրողին»:
«Մենք ապագայի տեսիլքով ենք այստեղ հավաքված, և մեր երկրի ամբողջ տաղանդը, հմտությունները, բնական ընծաները այսօր ներկայացված են այստեղ: Սա Հայաստան աշխարհին ծանոթանալու համար լավագույն միջոցն է»,- նշեց նա։
