«Ծափ պետք է տալ, երբ որ ԱԺ նախագահն ասում է՝ որոշումն ընդունվել է». Վիգեն Քոչարյանն ընտրվեց ԲԴԽ անդամ

Խորհրդարանը  114 կողմ, 4 դեմ  ձայների հաշվարկով Բարձրագույն դատական խորհուրդի անդամ ընտրեց Վիգեն Քոչարյանին:

 Քվեարկությանը 132 պատգամավորից մասնակցել է 119-ը, 1 քվեաթերթիկ անվավեր է ճանաչվել:

Հիշեցնենք, որ Վիգեն Քոչարյանի թեկնածությունը առաջադրել էր «Իմ քայլը» խմբակցությունը:

Քվերակության արդյունքները հայտարարելուց անմիջապես հետո պատգամավորները սկսեցին ծափահարել: Ազգային  ժողովի նախագահ Արարատ Միրզոյանը նկատեց.

«Ծափ պետք է տալ, երբ որ ԱԺ նախագահն ասում է՝ որոշումն ընդունվել է»:

 Եվս մեկ անգամ  հայտարարելով, որ որոշումն ընդունվել է, պատգամավորները կրկին ծափահարեցին:

Ընտրությունից անմիջապես հետո ԲԴԽ անդամը պետք է երդվեր, սակայն «Իմ քայլը» խմբակցության պատգամավոր Վլադիմիր Վարդանյանը տեղեկացրեց, քանի որ Վիգեն Քոչարյանը դեռ զբաղեցնում է Արդարադատության փոխնախարարի պաշտոնը, նա չի կարող երդում տալ:

«Որովհետև այդ դեպքում կստացվի, որ նա և՛ գործադիրի, և՛ դատական իշխանությունում պաշտոն է զբաղեցնում»,- պարզաբանեց նա:

«Իմ քայլը» խմբակցությունից Աննա Կարապետյանն էլ հղում արեց Դատական օրենսգրքին, որով պահանջվում է անհապաղ երդում տալ: Սա հայտարարելուց հետո խորհրդարանականները ծիծաղեցին:

Վարման կարգով ելույթ ունեցավ Նիկոլայ Բաղղասարյանը և նշեց, որ կա նաև Եվրոպական կոնվեցիայի 5-րդ և 6-րդ հոդվածներ, որը չի բացառում, որ անհապաղ երդում տալը լինի հաջորդ նիստում: Այդուհանդերձ, Արարատ Միրզոյանը հայտարարեց, որ երդումը տեղի կունենա հունիսի 24-ին՝ երկուշաբթի օրը: