Լավ է, որ Սամվել Կարապետյանն ու Նիկոլ Փաշինյանը հանդիպել են. ԱԺ նախագահ (տեսանյութ)
Աջակցիր «Ա1+»-ինԱզգային ժողովի նախագահ Արարատ Միրզոյանը հստակ պատասխան չունի, թե
ինչու իշխող խմբակցությունը Վահե Գրիգորյանին շատ հարցեր չուղղեց,
մինչդեռ նախորդ ՍԴ անդամի 2 թեկնածուներին հարցերով հեղեղել էր:
«Գուցե այն պատճառով, որ խմբակցությունում Վահե Գրիգորյանի հետ երկար
հանդիպում են ունեցել, կամ գուցե խմբակցության մի մասը Վահե Գրիգորյանին
վաղուց ճանաչում է, և հնարավորություն ունեցել են այս կամ այն կերպ
մտահոգիչ հարցերի շուրջ զրուցելու»,- եզրակացրեց նա:
Հարցին, թե Վահե Գրիգորյանին ՍԴ նախագահի պաշտոնում տեսնո՞ւմ է, ԱԺ նախագահն ասաց.
«Կարծում եմ, որ կոռեկտ չի լինի ԱԺ նախագահի կողմից այդպիսի կարծիք հնչեցնելը»:
Արարատ Միրզոյանն անդրադարձավ Ռուսաստանի դեսպանի՝ ԱԳՆ հրավիրվելու
փաստին: ԱԺ նախագահը նշեց, որ չի ողջունում դեսպանի և Հայաստանի երկրորդ
նախագահ Ռոբերտ Քոչարյանի հանդիպումը:
«Խոսքը ոչ թե նրա մասին է, որ որևէ երկրի դեսպան չպիտի հանդիպի
հայաստանյան ներքաղաքական ներկապնակի որևէ ներկայացուցչի հետ , ոչ, քավ
լիցի, խոսքը նրա մասին է, որ հանդիպում է արվում մի մարդու հետ, որի
նկատմամբ լուրջ մեղադրանք է առաջադրված, կա դատական գործընթաց, և այսպիսի
հանդիպումը կարող է դիտվել իբրև միջամտություն»- պարզաբանեց ԱԺ
նախագահը:
Ռուսաստաբնակ հայ խոշոր գործարար Սամվել Կարապետյանի հանդիպումը Նիկոլ
Փաշինյանի հետ Արարատ Միրզոյանը ողջունում է:
«Կարծում եմ՝ լավ է, որ հանդիպել են, այդպիսի հանդիպում նախկինում էլ է
եղել, այդ թվում՝ այլ գործարարների հետ: Հանդիպման մանրամասներին տեղյակ
չեմ, բայց որքան գիտեմ՝ խոսել են եղած տնտեսական ծրագրերի շարունակության
և նոր ներդրումների հնարավորության մասին»,- հայտնեց ԱԺ նախագահը:
