Դուք պետք է հեռանաք այս պաշտոնից. ԼՀԿ-ական պատգամավորը՝ Արթուր Ջավադյանին (տեսանյութ)
Աջակցիր «Ա1+»-ին«Դուք ո՛չ տնտեսագետ եք, ո՛չ ֆինանսիստ, ի՞նչ կապ ունեք Կենտրոնական բանկի հետ, ո՞րն է ձեր ներդրումը այս կառույցում»,- Ազգային ժողովում հարցը բարձրաձայնում է «Լուսավոր Հայաստան» խմբակցության պատգամավոր Արմեն Եղիազարյանը, դիմելով Կենտրոնական բանկի նախագահ Արթուր Ջավադյանին:
Արմեն Եղիազարյանը չի վերհիշում, թե ինչ ձեռքբերում է ունեցել Կենտրոնական բանկը, երբ այն նախագահել է Արթուր Ջավադյանը:
Վերջինս օրինակներ բերեց գնաճի կայունության, տնտեսական աճի ցուցանիշների, 2008 և 2014թթ. ֆինանսական ճգնաժամերի հաղթահարման վերաբերյալ և հավելեց, որ այդ ամենին հասել են Կենտրոնական բանկի թիմի պրոֆեսիոնալ լինելու շնորհիվ:
«Մեր համակարգը այնքան պինդ ու հուսալի էր, որ դիմացավ այդ ճգնաժամերին, իսկ աշխարհի բավականին լուրջ բանկեր ու կառույցներ չդիմացան դրան»,- ընդգծեց Արթուր Ջավադյանը:
Ինչ վերաբերում է մասնագիտությամբ տնտեսագետ չլինելուն, ապա Ջավադյանն ընդգծեց, որ այնպես չէ, որ ֆինանսներից պատկերացում չունի, դասընթացներ ունեցել է: Իսկ մինչև Կենտրոնական բանկ գալը, Հայաստանի առևտրային բանկի ղեկավար է եղել:
ԿԲ նախագահի պատասխանը չգոհացրեց Արմեն Եղիազարյանին: Նա պահանջեց Ջավադյանից մատնանշել այնպիսի բան, որը կարելի է վերագրել անձամբ նրան:
«Որևէ ընդհանրություն Ձեր և Կենտրոնական բանկի միջև չեմ տեսնում: Կարծում եմ, դուք պետք է հեռանաք այս պաշտոնից»,- շեշտեց Արմեն Եղիազարյանը:
Մանրամասները՝ տեսանյութում:
