Մեր հրաձիգները մարզվելու համար փամփուշտներ չունեն. Սեյրան Նիկողոսյան
Հայաստանի հրաձգության հավաքականի գլխավոր մարզիչ Սեյրան Նիկողոսյանն այնքան էլ գոհ չէ թիմի ելույթներից Եվրոպայի առաջնությունում, չնայած նրա սաներից մի քանիսը մեդալ են նվաճել: «Մինչ Եվրոպայի առաջնությունը, մենք ուսումնամարզական հավաք անցկացրինք, որի ժամանակ մարզիկները լավ արդյունքներ գրանցեցին, բայց բուն առաջնության արդյունքներից գոհ չեմ: Նրանք ավելիին էին պատրաստ, սակայն փորձի պակասը խանգարեց լավ արդյունքներ գրանցելու համար», - «Արմենպրեսում» կայացած մամուլի ասուլիսում ասաց մարզիչը: Մասնագետի կարծիքով, հրաձիգները ամեն տարի նվազագույնը պետք է մասնակցեն 4-5 միջազգային մրցաշարերի, որպեսզի պահպանեն իրենց մարզավիճակը: «Հայաստանում կազմակերպված ուսհավաքները նույն արդյունքը չեն տալիս, ինչ արտասահմանում անցկացրածները, քանի որ դրսում մարզիկները նոր զենքերի հետ են ծանոթանում, որակյալ փամփուշտներով են մարզվում: Իսկ Հայաստանն ունի մի քանի մարզադպրոց, որտեղ պարզապես փամփուշտ չկա: Օրինակ՝ Երեւանի հրաձգության մարզադպրոցում փամփուշտ չկա մարզվելու համար: Ֆեդերացիան հավաքականի անդամներին ապահովում է փամփուշտներով, զենքով, իսկ ահա մարզադպրոցները չունեն նման հնարավորություններ», - նշեց գլխավոր մարզիչը: «Ա1+»-ի այն հարցին, արդյո՞ք մեր սպորտի ղեկավարները տեղյակ են այդ խնդրի մասին, նա պատասխանեց. «Հայաստանում շատերը չեն հասկանում հրաձգությունից, չեն պատկերացնում դրա խնդիրները: Նորմալ երկրներում ամեն տարի թարմացնում են զենքերը, մարզիկների հանդերձանքը: Մենք ամեն ինչի պակաս ունենք: Մարզադպրոցի տնօրենները դիմում են պատկան մարմիններին, սակայն միշտ նույն պատասխանն են ստանում՝ գումար չկա, մի քիչ էլ սպասեք: Նորից եմ կրկնում, ֆեդերացիան մարզագույքով ապահովում է միայն հավաքականի անդամներին, որոնք 12-ն են: Իսկ մնացած 100 եւ ավելի հրաձիգների մասին ո՞վ պետք է մտածի», - եզրակացրեց Սեյրան Նիկողոսյանը: Խոսելով առաջիկա ծրագրերի մասին, գլխավոր մարզիչը հայտնեց, որ առաջիկայում հրաձիգները մասնակցելու են Զինաիդա Սիմոնյանի հուշամրցաշարին, իսկ մայիսին հավաքականը մասնակցելու է Մյունխենում անցկացվող աշխարհի գավաթի խաղարկությանը, որը նաեւ վարկանիշային է: Հունիսին մեր երկու հրաձիգները հանդես են գալու Մինսկում կայանալիք Եվրոպական խաղերին: Ֆեդերացիան առայժմ ուսհավաք չի նախատեսել այդ մրցաշարերից առաջ:
