Հիմնադիր խորհրդարանը և Սասնա ծռեր խմբավորումը՝ Սերգեյ Լավրովի հայտարարության վերաբերյալ
Հիմնադիր խորհրդարանի քարտուղարության և Սասնա ծռեր խմբավորման հայտարարությունը՝ Հայաստանը վասալային կարգավիճակում պահելու կրեմլյան նոր փորձի առթիվ Անցնող երկու ամիսներին Հայաստանում տեղի ունեցող էական զարգացումների վերաբերյալ պաշտոնապես լուռ մնալուց և իր զգուշացնող ուղերձներն ու թաքուն սպառնալիքները անուղղակի միջոցներով, մինչև անգամ հայանուն խոսնակների միջոցով փոխանցելուց հետո, Ռուսաստանը, ի դեմս արտգործնախարար Սերգեյ Լավրովի, հուլիսի 31-ի հայտարարությամբ իր առաջին պաշտոնական և հրապարակային զգուշացումն է կատարում ՀՀ նոր իշխանություններին ու ընդհանրապես Հայաստանին: Այս կապակցությամբ Հիմնադիր խորհրդարանի քարտուղարությունն ու Սասնա ծռեր խմբավորումը ամրագրում են հետևյալ պարզ ճշմարտությունները: - Սերգեյ Լավրովի հայտարարությունը ոչ միայն կոպիտ միջամտություն է Հայաստանի ներքին գործերին, որն ամբողջությամբ անընդունելի է, այլև փորձում է Հայաստանը պահել վասալային կարգավիճակում, որն իհարկե դատապարտված է անփառունակ ձախողման, և որի միակ արդյունքը լինելու է Հայաստանի և հայ ժովովրդի ինքնիշխանության հասնելու վճռականության բազմապատկումը: - Ժամանակն է, որ Կրեմլը վերջնականապես գիտակցի, որ Ռուսաստանի նկատմամբ Հայաստանի կեցվածքը կախված է Հայաստանի արժանապատվության և շահերի նկատմամբ Ռուսաստանի դիրքորոշումից: Կրեմլի կողմից հարգանքի դեպքում Հայաստանը կմնա բարեկամ և գործընկեր երկիր: Այդ հարգանքի բացակայության դեպքում Ռուսաստանը կկորցնի Հայաստանը՝ որպես բարեկամ և գործընկեր երկիր: Հիմնադիր խորհրդարանի քարտուղարությունն ու Սասնա ծռեր խմբավորումը, - Արձանագրելով, որ ՀՀ նոր իշխանությունները իրավիճակին արձագանքում են պատասխանատվությամբ և արժանապատվությամբ, նրանց հորդորում են շարունակել բարձր պահել Հայաստանի պատիվն ու ոչ մի դեպքում չընկրկել: - Կոչ են անում մեր ժողովրդին և բոլոր ազնիվ ուժերին մշտապես զգաստ լինել՝ ցանկացած դավադրության փորձ խափանելու համար: - Իրենց վճռականությունն ու պատրաստակամությունն են հայտնում պաշտպանելու Հայաստանի ինքնիշխանության առկա մակարդակը և այն հասցնելու առավելագույն աստիճանի: Հիմնադիր խորհրդարանի քարտուղարություն Սասնա ծռեր խմբավորում 1 օգոստոսի 2018թ.
