Պաշտպանը խնդրում է գտնել 300 հոգանոց զինված խմբին (տեսանյութ)
Շուշիի առանձնակի գումարտակի հրամանատար Ժիրայր Սեֆիլյանի պաշտպանը խնդրում է բացահայտել 300 հոգանոց զինված խմբին, որոնք ըստ գլխավոր դատախազի` պետք է հեղաշրջում անեին դեռեւս 2015թ ապրիլի 24-ին: «300 զինված խմբեր, անձինք, որոնք այս պահին շրջում են ՀՀ-ում եւ իրենք չեն բացահայտվել, ովքե՞ր են: Հարգելի դատարան, ես չեմ ուզում ապրել մի երկրում, որտեղ 300 հոգի զինված, ցանկացած ժամանակ կարող են հեղաշրջում, հեղափոխություն անել, իսկ դատախազությունը հանգիստ նստած է դատարանում: Գլխավոր դատախազը հանգիստ շարունակում է պաշտոնավարել, իրավական մարմինների եւ քննչական մարմինների պետերը հանգիստ պաշտոնավարում են, այն պարագայում, երբ Սեֆիլյանին մեղադրում են 300 հոգանոց խմբերի, ենթախմբերի հրամանատար լինելու հանգամանքով: Խնդրում եմ բացահայտեք այդ անձանց, եթե չենք կարողանում բացահայտել, հրաժարական տվեք»,- այսօր դատարանում հայտարարեց Տիգրան Հայրապետյանը: Նա համոզված է՝ զանգվածային անկարգությունների մեղադրանքը դա քողարկված քաղաքական հոդված է. «Ես հայտարարում եմ՝ Ժիրայր Սեֆիլյանը եւ Հիմնադիր խորհրդարանի այն անդամները, ում այս մեղադրանքը առաջադրված է, քաղբանտարկյալներ են»,- ավելացրեց Տիգրան Հայրապետյանը: Վկաներին լսելուց հետո վերացվեց տեսանկարահանման արգելքը։ Բայց մինչ այդ արդեն հրապարակվել էր «Հիմնադիր խորհրդարան»-ում աշխատող համակարգչային մասնագետի ցուցմունքը: Պաշտպան Արայիկ Պապիկյանը հայտարարեց՝ մեղադրական եզրակացության մեջ նշվածը չի համապատասխանում իրականությանը: «Մեղադրական եզրակացության մեջ բառացի նշված է, որ վերջինիս հանձնարարությամբ Սեֆիլյանի եւ մյուսների կոչերը մուտքագրել է համակարգիչ եւ տարածել, վկան այդպիսի ցուցմունք չի տվել: Նման բան չկա գրված, հետեւաբար մեղադրական եզրակացության մեջ խեղաթյուրել են իրականությունը, գոյություն չունեցող հանգամանք են նշել»: Այսօր դահլիճ բերվեց նաեւ զանգվածային անկարգություններ կազմակերպելու նախապատրաստության մեջ մեղադրվող Գեւորգ Սաֆարյանը, թեեւ սանկցիայի ժամկետը դեռ չէր լրացել: Տաթեւիկ Գրիգորյանը, սակայն, Գեւորգ Սաֆարյանին թույլ չտվեց նստած տեղից հայտարարություն անել՝ սպառնալով, որ կհեռացնի դահլիճից: Այսօր պաշտպաններից Արայիկ Պապիկյանը միջնորդեց դեպքի հետ կապված դատարան հրավիրել եւ հարցաքննել մի խումբ անձանց՝ այդ թվում Սասնա ծռեր խմբի անդամ Արմեն Լամբարյանին: Դատավորն այդ միջնորդության քննարկումը հետաձգեց, փոխարենը սկսեցին հետազոտել գործում առկա ապացույցները:
