Արցախում ընդունել են Կալիֆորնիայի նահանգային խորհրդարանի պատվիրակությանը (տեսանյութ)
Արցախի Հանրապետության Նախագահ Բակո Սահակյանը հոկտեմբերի 7-ին ընդունել է Կալիֆորնիայի նահանգային խորհրդարանի պատվիրակությանը: Հանդիպմանը քննարկվել են Կալիֆորնիա-Արցախ հարաբերություններին եւ ադրբեջանա-ղարաբաղյան հակամարտության կարգավորմանը վերաբերող մի շարք հարցեր: Նախագահ Սահակյանը նշել է, որ ԱՄՆ-ի, մասնավորապես՝ Կալիֆորնիա նահանգի հետ կապերի զարգացմանն ու խորացմանը հատուկ ուշադրություն է դարձվում Արցախում՝ հույս հայտնելով, որ փոխգործակցությունը հետզհետե կընդլայնվի: ԱՐՑԱԽԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ ԱՇԽԱՏԱԿԱԶՄԻ ՏԵՂԵԿԱՏՎՈՒԹՅԱՆ ԳԼԽԱՎՈՐ ՎԱՐՉՈՒԹՅՈՒՆ ----------------------------- Հոկտեմբերի 7-ին Արցախի Հանրապետության Ազգային ժողովում ընդունել են ԱՄՆ Կալիֆորնիա նահանգի խորհրդարանական պատվիրակությանը, որի կազմում էին նահանգային Սենատի անդամ Սքոթ Ուլիքը, Ասամբլեայի անդամներ Ադրին Նազարյանը, Դանթե Աքոստան, Լորա Ֆրիդմանը, Մարք Լևինը: Պատվիրակությանը ուղեկցում էին ամերկահայ համայնքի ներկայացուցիչներ: Հյուրերին իր աշխատասենյակում ողջունել է Ազգային ժողովի նախագահ Աշոտ Ղուլյանը և ընդգծել Կալիֆորնիա - Արցախի Հանրապետություն առանձնահատուկ բարեկամական հարաբերությունների և տարբեր մակարդակի պատվիրակությունների հետ ավանդույթ դարձած հանդիպումների կարևորությունը: Անդրադառնալով Կալիֆորնիայի կողմից Արցախի Հանրապետության անկախության ճանաչմանը՝ խորհրդարանի նախագահը նշել է. «Համոզված եմ, որ այդ որոշման հիմքում եղել է Կալիֆորնիայի ժողովրդի և անձամբ ձեր հարգանքը ազատության համար Արցախի ժողովրդի պայքարի, անկախության ճանապարհին գրանցած հաջողությունների և տարածաշրջանում խաղաղություն պահպանելու հարցում նրա ունեցած դերի հանդեպ»: Այնուհետև ԱԺ նիստերի փոքր դահլիճում տեղի է ունեցել պատվիրակության հանդիպումը խորհրդարանի խմբակցությունների պատասխանատուների հետ, որի ընթացքում մասնակիցները մտքեր են փոխանակել 2016 թվականի ապրիլից հետո Արցախում առկա իրավիճակի, տարածաշրջանի անվտանգության ուղղությամբ իրականացվող աշխատանքների, տարբեր ոլորտներում գործնական կապերի, մասնավորապես կրթական համակարգում հնարավոր համագործակցության հարցերի շուրջ: Պայմանավորվածություն է ձեռք բերվել խորացնելու համայքների մակարդակով ձևավորված փոխգործակցությունը: Խորհրդարանում կայացած հանդիպումներին մասնակցել են ԱԺ նախագահի տեղակալ Վահրամ Բալայանը և ԱՀ ԱԳ փոխնախարար Արմինե Ալեքսանյանը: Տեղեկացնենք, որ ԱՄՆ Կալիֆորնիա նահանգի Սենատը Լեռնային Ղարաբաղի Հանրապետության անկախությունը և Արցախի ժողովրդի ինքնորոշման իրավունքը ճանաչող բանաձև է ընդունել 2014 թվականի օգոստոսի 28-ին: Արցախի Հանրապետության ԱԺ մամուլի ծառայություն https://www.youtube.com/watch?v=d9Ap3u8OAYQ
