Հանդիպում Պետքարտուղարության բարձրաստիճան պաշտոնյաների հետ
ԱՄՆ-ում ՀՀ դեսպան Գրիգոր Հովհաննիսյանը հանդիպում է ունեցել ԱՄՆ պետքարտուղարի՝ եվրոպական և եվրասիական հարցերով փոխտեղակալ Բրիջիթ Բրինքի, Կովկասի ու տարածաշրջանային հակամարտությունների հարցերով գրասենյակի տնօրեն Նատաշա Ֆրանչեսկիի, Հայաստանի հարցերով պատասխանատու Թեդ Մասիի, ինչպես նաև Հայաստանում ԱՄՆ դեսպանի տեղակալ Ռաֆիկ Մանսուրի հետ: Հանդիպման ընթացքում քննարկվեցին Հայաստան-Միացյալ Նահանգներ փոխհարաբերություններին վերաբերող մի շարք հարցեր, անդրադարձ կատարվեց հայ-ամերիկյան համագործակցության զարգացման հեռանկարներին: Պետքարտուղարի փոխտեղակալ Բրինքը նշեց, որ ԱՄՆ վարչակազմը ձգտում է օտարերկրյա պետությունների հետ իր հարաբերություններում շեշտը դնել հիմնականում անվտանգությանն ու տնտեսությանը վերաբերող հարցերի վրա: Դեսպան Հովհաննիսյանը հատկապես կարևորեց ԱՄՆ-ի ու Հայաստանի միջև ապրանքաշրջանառության ծավալների մեծացման, ինչպես նաև տեղեկատվական տեխնոլոգիաների ոլորտում փոխգործակցության խորացման անհրաժեշտությունը` հաշվի առնելով վերջին տարիներին Հայաստանում այդ բնագավառում արձանագրված առաջընթացը: ԱԳՆ
