Նախարարությունը չգիտի, թե վթարված ավտոբուսը որ ընկերությանն է պատկանում
Դեռ հայտնի չէ, թե Հյուսիսային Օսեթիայում` Բեսլան քաղաքից 6 կմ հեռավորության վրա վթարի ենթարկված ավտոբուսը որ ընկերությանն է պատկանում: Տրանսպորտի, կապի եւ տեղեկատվական տեխնոլոգիաների նախարարությունից «Ա1+»-ի հարցմանն ի պատասխան հայտնեցին, որ վթարի ենթարկված ավտոբուսը ոչ կանոնավոր ուղևորափոխադրում էր իրականացնում Մոսկվա-Երևան ուղղությամբ: Ավտոբուսի եւ բեռնատարի բախման ընթացքում 5 մարդ է զոհվել, 27-ը՝ վիրավորվել: Ըստ նախնական տեղեկությունների՝ ավտոբուսում եղել է 52 ուղևոր: Տուժածները, այդ թվում` 4 երեխա, անմիջապես տեղափոխվել են Վլադիկավկազ քաղաքի տարբեր հիվանդանոցներ: Հիշեցնենք, որ նախորդ տարվա նոյեմբերին էլ ՌԴ Տուլայի տարածաշրջանի Ուզլովսկի քաղաքի մոտ դեռևս չբացահայտված հանգամանքներում վթարի էր ենթարկվել «Քինգ դելյուքս» ՍՊ ընկերությանը պատկանող ավտոբուսը: Այն ժամանակ էլ էր նշվել, որ ոչ կանոնավոր ուղևորափոխադրում է իրականացվել Մոսկվա-Երևան ուղղությամբ։
