Համանախագահները հանդիպել են ՀՀ և Ադրբեջանի արտգործնախարարների հետ
ԵԱՀԿ Մինսկի խմբի համանախագահների հայտարարությունը ԵԱՀԿ Մինսկի խմբի համանախագահներ Իգոր Պոպովը, Ջեյմս Ուորլիքը, Պիեր Էնդրիուն և ԵԱՀԿ գործող նախագահի անձնական ներկայացուցիչ Անջեյ Կասպշիկը առանձին հանդիպումներ են ունեցել Հայաստանի եւ Ադրբեջանի Արտաքին գործերի նախարարների հետ Նյու-Յորքում, ՄԱԿ-ի Գլխավոր ասամբլեայի շրջանակներում։ Քննարկվել են Լեռնային Ղարաբաղի հակամարտության կարգավորման հարցին առնչվող մանրամասներ: «Հանդիպումների ընթացքում մենք հատուկ ուշադրություն ենք դարձրել Վիեննայում (2016 թ. մայիս) և Սանկտ Պետերբուրգում (2016 թ. հունիս) կայացած գագաթնաժողովներին ձեռք բերված պայմանավորվածությունների իրականացմանը: Մասնավորապես, մենք քննարկել ենք հետագա քայլերը, որոնք կարող են մթնոլորտ ստեղծել բանակցությունները խթանելու եւ խնդրի կարգավորմանը հանգեցնելու համար: Մենք նաեւ մտքեր ենք փոխանակել այն առաջարկությունների շուրջ, որոնք կարող են քննարկվել կողմերի միջեւ: Մեր կառավարությունները պատրաստ են հյուրընկալելու նախագահներին կամ արտաքին գործերի նախարարներին»,- ասված է ԵԱՀԿ հայտարարության մեջ։ Համանախագահները նախատեսում են տարածաշրջան այցելել մոտ ապագայում:
