Բացել լրահոսը Փակել լրահոսը
A A

ԼԵԳԻՈՆԵՐՆԵՐԸ ՉԵՆ ՄԵԿՆԻ ՍԱՆ ՄԱՐԻՆՈ

Սպորտ

Ֆուտբոլի Հայաստանի մինչեւ 17, 19 եւ 21 տարեկանների հավաքականների գլխավոր մարզիչներն այսօր մամուլի ասուլիս տվեցին, որի ընթացքում խոսվեց վերջերս կայացած ստուգողական հանդիպումների եւ մայիսի 17-ին Սան Մարինոյում կայանալիք Սան Մարինո–Հայաստան երիտասարդական հավաքականների հանդիպման մասին:

Երիտասարդականի մարզիչ Սամվել Պետրոսյանը նշեց, որ հավաքականից բացակայում են Էդգար Մանուչարյանը, Ժորա Հովհաննիսյանը, Ռուսաստանում հանդես եկող Դենիս Թումասյանը եւ Ռոբերտ Զաբելյանը եւ ֆրանսահայ մեկ ֆուտբոլիստ:

Սակայն նշենք, որ վերը նշված ֆուտբոլիստներից միայն Էդգար Մանուչարյանը եւ Ժորա Հովհաննիսյանն են հանդես եկել երիտասարդականում, իսկ Էդգարն արդեն 2 տարի է համարվում է ազգային թիմի խաղացող: Սամվել Պետրոսյանը հավաքականի ամենաթույլ օղակը համարեց դարպասապահի հարցը: Ներկայումս դարպասապահներն են «Փյունիկը» ներկայացնող Էդգար Գասպարյանը եւ Արթուր Հարությունյանը:

17 եւ 19 տարեկանների մարզիչներ Արսեն Չիլինգարյանը եւ Արմեն Գյուլբուդաղյանցը պատմեցին իրենց ղեվարած թիմերի Իրանում անցկացրած ստուգողան հանդիպումների մասին, որոնք ըստ մարզիչների բավական օգտակար էին միջազգային հանդիպումների փորձ չունեցող հայ պատանիների համար: 19 տարեկանները 2 ընկերական հանդիպումներ էին անցկացրել Իրանի իրենց հասակակիցների հետ:

Առաձին խաղում իրանացիները հաղթել էին 4:1 հաշվով, սակայն ինչպես տեղեկացրեց ասուլիսի մասնակից գործկոմի անդամ եւ Իրանում հայկական պատվիրակությունը գլխավորած Լեւոն Հասրաթյանը, այդ մրցավեճում Իրանի հավաքականը հանդես է եկել հիմնականում 23 տարեկան ֆուտբոլիստներով:

2-րդ մրցավեճում հայ ֆուտբոլիստներն ավելի հաջող են հանդես եկել, սակայն հանդիպման վերջին րոպեին բաց թողած գոլի պատճառով պարտվել նվազգույն 0:1 հաշվով:

17 տարեկանները կրկին Իրանում մասնակցել են միջազգային խոշոր մրցաշարի, որը կազմակերպել էր Ասիայի ֆուտբոլի կոնֆեդերացիան: Առաջին խաղում հայ պատանիները խոշոր 0:5 հաշվով զիջել են Իրաքին: Այդ խաղը տեղի էր ունեցել մայիսի 3-ին:

«Առանց այդ էլ հոգեբանական բարդույթ ունեցող մեր պատանիները այդ հանդիպումից առաջ իմացել էին ինքնաթիռի ավիավթարի մասին, ինչը ցնցել էր բոլորիս», - ասաց պատվիրակությունը մրցաշարի ընթացքում ղեկավարած գործկոմի անդամ Ռուբեն Սինոյանը: Սակայն հաջորդ հանդիպումներում 17 տարեկանները կարողացել են սթափվել եւ պատճաշ արդյունքի հասնել:

Նախ Չինաստանի հետ հանդիպումը մեր պատանիներն ավարտել են 2:2 հաշվով, իսկ վերջին խաղում 1:0 հաշվով հաղթել են Իրանին: Ի վերջո, Հայաստանը խմբում գրավել է 3-րդ տեղը՝ զրկվելով կիսաեզրափակիչի ուղեգրից: