Զբոսաշրջիկները հրաժարվել են այցելել Արցախ (տեսանյութ)
Քառօրյա պատերազմը բացասաբար է անդրադարձել Ղարաբաղ այցելելու ցանկություն ունեցող զբոսաշրջիկների վրա: Տուրիստական ընկերության տնօրեն Սյուզաննա Մալխասյանը պատմում է, որ մինչ ապրիլմեկյան իրադարձությունները նախատեսված էր ՌԴ-ից 50 հոգանոց զբոսաշրջիկների այց Հայաստան, այդ թվում նաև մի քանի օրյա այցելություն դեպի Արցախ, որը , սակայն չեղարկվել է: «Միակ պատճառաբանությունը Ղարաբաղում ստեղծված իրավիճակն էր, ինչպես նաև սոցկայքերում անընդմեջ շրջանառվող լուրերը՝ կապված այնտեղի իրավիճակի նկարագրման հետ և այս պատճառով, իհարկե, այցելությունը չեղարկվեց»,- «Ա1+»-ի հետ զրույցում ասաց Սյուզաննա Մալխասյանը: Մինչդեռ, վերջինիս հավաստմամբ՝ նախկինում նման խնդիրներ չեն ունեցել: Հակառակը՝ Հայաստան եկած ցանկացած զբոսաշրջիկ պարտադիր այցելել է նաև Արցախ: ԼՂՀ էկոնոմիկայի նախարարության զբոսաշրջության վարչության ծրագրերի կառավարիչը ևս մտավախություն ունի , որ ռազմական գործողությունները բացասաբար են անդրադառնալու զբոսաշրջիկների թվի վրա: Նրա խոսքերով՝ թեև Արցախում դեռ նոր է բացվում տուրիստական սեզոնը և վիճակագրական տվյալների մասին խոսելը դեռևս վաղ է, այդուհանդերձ, Արցախի դրական հեղինակությունը որոշ առումներով կփոխվի: «Այս քառօրյա պատերազմը ազդել է հենց Արցախի, որպես զբոսաշրջային ուղղություն դրական իմիջի վրա: Դրա համար ենք մենք մտահոգված, որ կարող է ինչ-որ նվազում լինի, բայց գնահատականներ տալու համար դեռ վաղ է: Կփորձենք մինչև ամառվա սկիզբ հասկանալ ինչ է կատարվում ընդհանրապես Արցախում զբոսաշրջության հետ»,- մեզ հետ զրույցում նշեց Արտակ Գրիգորյանը: Վերջինս նաև հավելում է, որ 2015թ-ին ունեցել են մոտ 15 % օտարերկրյա զբոսաշրջիկների աճ, իսկ Արցախ այցելող օտարերկրյա զբոսաշրջիկների մոտ 55 %-ը ՌԴ-ից է: «Առաջին հնգյակի մեջ մտնում են ՌԴ, Ֆրանսիան , ԱՄՆ-ն , Վրաստանը և 2014թ-ին նաև բավականին մեծ թվով զբոսաշրջիկներ կային Ուկրաինայից»,-տեղեկացրեց Արտակ Գրիգորյանը: Իսկ հանարվո՞ր է, որ ապրիլմեկյան իրադարձությունները զբոսաշրջիկների այցելության համար խթան հանդիսանան: Հարցին ի պատասխան Արտակ Գրիգորյանը շեշտեց. «Իհարկե, կա նման զբոսաշրջության ձև, դա ռազմապատմական զբոսաշրջությունն է, որը, իհարկե, տեղ ունի զարգանալու: Բայց չեմ կարծում, որ տեղեկատվական այս ֆոնը, որ ստեղծվել է Ղարաբաղի շուրջ և ընդհանրապես այս տարածաշրջանի շուրջ՝ ինչ-որ դրական միտումներ կունենա»: Ապրիլի 15-17-ը Երևան էքսպո կենտրոնում տեղի ունեցավ «Ին-տուր 2016» 3-րդ միջազգային մասնագիտացված ցուցահանդեսը, որին մասնակցում էին ինչպես Հայաստանի և Արցախի, այնպես էլ Եգիպտոսի, Իսրայելի, Ռուսաստանի և բազմաթիվ այլ երկրների տուրիստական կազմակերպություններ: Ցուցահանդեսին Արցախը մասնակցում էր 2-րդ անգամ: