Կարմիր Խաչը մանրամասներ չի ներկայացնում
Կարմիր Խաչի միջազգային կոմիտեն չի մանրամասնում, թե հայկական և ադրբեջանական կողմերի իրականացրած` զոհվածների որոնողական աշխատանքներից հետո ի՞նչ գործողություններ են պատրաստվում կատարել: «Ինչ վերաբերում է այլ փուլերին եւ գործողության ավարտին, այլ մանրամասներ հաղորդել չեմ կարող` հաշվի առնելով , որ դա երկխոսության մասն է կազմում: Կարող եմ միայն ասել, որ ամբողջ գործողությունը ավարտված չէ: Ավարտված կհամարվի այն ժամանակ, երբ ընտանիքները, որոնք սպասում են լուրերի, երկու կողմերում կստանան պատասխաններ: Այդ ժամանակ կարող ենք հաստատել, որ ավարտվել է»,- «Ա1+»-ի հետ զրույցում նշեց ԿԽՄԿ հայաստանյան գրասենյակի հաղորդակցման ծրագրերի ղեկավար Զառա Ամատունին։ Հիշեցնենք, որ երեկ հայկական և ադրբեջանական կողմերը Կարմիր Խաչի միջազգային կոմիտեի եւ ԵԱՀԿ Մինսկի խմբի գործող նախագահի անձնական ներկայացուցչի դաշտային օգնականների միջնորդությամբ, իրականացրել են զոհվածների որոնողական աշխատանքներ, որոնց արդյունքում հայկական կողմը հայտնաբերել է ՊԲ զինծառայողներ, 20-ամյա երիտասարդներ՝ Ռոբերտ Աբաջյանի եւ Անդրանիկ Զոհրաբյանի դիերը: ԼՂՀ նախագահի մամուլի քարտուղար Դավիթ Բաբայանն էլ նշել էր, որ դեռ 2-3 օր կպահանջվի զոհվածների մարմինների որոնումն ու դուրսբերումն ավարտելու համար:
