Նաիրա Զոհրաբյան. «Սխոդկաներն են որոշում, թե ում ինչ մրցանակ տրվի»
«Իրական արժեքից շատ ենք հեռացել եւ սխոդկաներն են որոշում, թե որտեղ ինչ մակարդակով պիտի տրվեն էդ մրցանակները, այստեղ խնդիր կա: Ես չգիտեմ, թե ինչպես կքվեարկի ԲՀԿ-ն»,- «Վաստակավոր շինարարի» կոչում սահմանելու մասին օրինագծի քննարկումներին ասում է ԲՀԿ խմբակցության ղեկավար Նաիրա Զոհրաբյանը: Նա դեմ չէ, որ «Վաստակավոր շինարարի» կոչում էլ լինի, բայց հոգեւոր ճգնաժամի պայմաններում այդ կոչումը ոչինչ է: Ի վերջո, ովքե՞ր են կոչումներ շնորհողները: Պատգամավորը չի ընկալում այսօր կոչումներ ներկայացնող ստեղծագործական կազմակերպությունների դերը. «Ես լինելու եմ նախաձեռնողներից մեկը, որպեսզի այստեղ լսումներ կազմակերպվեն՝ պե՞տք են մեզ ստեղծագործական միությունները: Եվ միայն դրանից հետո կխոսենք կոչումներ շնորհելու մասին: Մի կոչում ավել, մի կոչում պակաս, եղանակ չի ստեղծում»: