Շաբոյանը չի ուզում խոսեն կատարվածի մասին, այլ՝ կատարվելիքի (տեսանյութ)
ՏՄՊՊՀ հանձնաժողովի նախագահ Արտակ Շաբոյանը խոստացավ Ազգային ժողովում իրենց հասցեագրված հարցերին գրավոր պատասխանել։ Սակայն նաև անդրադարձավ հնչած «քաղաքականացված» հայտարարություններին. «Դրանք օբյեկտիվ չեն և իրականությանը չեն համապատասխանում։ Ելույթներին կպատասխանեմ և կակնկալեմ պատասխաններ։ Անարդար եմ համարում մեր հանձնաժողովի նկատմամբ քննադատությունները, որովհետև մեր հանձնաժողովը իր սահմանափակ աշխատակազմով, սահմանափակ ֆինանսական ռեսուրսներով բոլոր ջանքերը գործադրում է»։ Արտակ Շաբոյանը նաև հիշեցրեց՝ իրենք հաշվետվություն չեն ներկայացնում և հայտարարությունները պետք է լինեն ոչ թե կատարված աշխատանքի վերաբերյալ, այլ կատարվելիքի մասին. «Հանձնաժողովը տարեկան 500 որոշում է կայացնում, խոսում տարբեր գերատեսչություններում առկա թերությունների մասին և հետամուտ լինում խնդիրները շահագրգիռ պետական մարմիններին փոխանցելու հարցում»։ Ըստ նրա՝ երբեմն հարցերի կարևորությունն ու հասարակական հնչեղությունը հաշվի առնելով՝ ՏՄՊՊՀ-ն առավելագույնս է օգտագործում իրեն տրված լիազորությունները. «Մեր երկրում որևէ տնտեսվարող չի կարող ասել, որ որևէ խնդիր, որ եղել է հանձնաժողովի լիազորությունների սահմանում, հանձնաժողովը հետևողական չի եղել դրանք լուծելու»։