Վարչապետը ներկա է գտնվել Համահայկական վեցերորդ խաղերի փակման արարողությանը
Վարչապետ Հովիկ Աբրահամյանն այսօր Երևանի Ազատության հրապարակում մասնակցել է Համահայկական ամառային վեցերորդ խաղերի փակման հանդիսավոր արարողությանը: Խաղերի փակման առիթով կառավարության ղեկավարը հանդես է եկել ելույթով.
«Սիրելի հայրենակիցներ,
Հարգելի տիկնայք և պարոնայք,
ՀՀ կառավարության և անձամբ իմ անունից սրտանց շնորհավորում եմ բոլորիս Համահայկական վեցերորդ խաղերը բարձր մակարդակով կազմակերպելու և անցկացնելու համար:
Անցած տասնմեկ օրերի ընթացքում քաղաքամայր Երևանը դարձել էր ողջ աշխարհի հայ մարզիկների յուրահատուկ հավաքատեղի: Տարբեր մարզաձևերում ազնիվ պայքարի հետ մեկտեղ դուք հնարավորություն ունեցաք հաստատել նոր շփումներ, ձեռք բերել նոր ընկերներ աշխարհի տարբեր ծայրերից ժամանած մեր հայրենակիցների շրջանում:
Իմ խորին համոզմամբ՝ Համահայկական խաղերի ամենակարևոր ձեռքբերումը մեր ժողովրդի հազարավոր զավակների մեկտեղումն է մայր հայրենիքում՝ այդպիսով նոր շունչ հաղորդելով նաև Հայաստան-Արցախ-Սփյուռք եռամիասնության հետագա ամրապնդմանը: Այս առումով, Համահայկական խաղերն այն եզակի մրցաշարերից են, որտեղ չկան հաղթողներ ու պարտվողներ: Հաղթել ենք բոլորս, քանի որ Համահայկական խաղերը մեր միասնության իրական ապացույցն ու դրսևորումն են:
Սիրելի մարզիկներ,
Խորհրդանշական է, որ Համահայկական վեցերորդ խաղերն անցկացվեցին Հայոց ցեղասպանության 100-րդ տարելիցի ոգեկոչման արարողություններին զուգընթաց: Նշանակալի է խաղերի դերը մեր ժողովրդի համար հիշատակի այս տարում, որը ևս մեկ անգամ միավորեց համայն հայությանն ու մայր հայրենիքում ապահովեց հայաշունչ միջավայր: Այս միջավայրում է կրկին ընդգծվում մեր միասնականությունն ու հայի ուժը, ինչը մեր երկրի հետագա զարգացման և ձեռքբերումների հիմնական գրավականն է: Վստահ եմ, որ դուք կշարունակեք հայրենիքից դուրս պահպանել հայի ինքնությունն ու գործել ի նպաստ հայապահպանության ամրապնդման:
Հարգելի ներկաներ,
Տիկնայք և պարոնայք,
Ցանկանում եմ ուրախությամբ նշել, որ նախորդ խաղերի համեմատ այս խաղերին մասնակցել են վեց հազարից ավելի մարզիկ-մարզուհիներ, ինչն աննախադեպ է: Այս ընթացքում ձեզ հետ հայրենիք են ժամանել նաև ձեր բազմաթիվ հարազատներ, բարեկամներ, մարզիչներ, ընկերներ և երկրպագուներ: Վստահ եմ, որ Համահայկական յոթերորդ խաղերին մասնակիցների թիվը կլինի էլ ավելի, և այս միջոցառումը կշարունակի իր հայանպաստ առաքելությունը:
Սիրելի քույրեր և եղբայրներ,
Լա´վ իմացեք, ձեզնից յուրաքանչյուրը մեզ՝ հայրենիքում ապրողներիս համար, մշտապես սպասված և ցանկալի անձ է: Ուստի կոչ եմ անում՝ օգտագործե´ք յուրաքանչյուր հնարավորություն, այցելե´ք Հայաստան և Արցախ, վայելե´ք հայրենիքի ջերմությունն ու ձեր հայրենակիցների հոգատար վերաբերմունքը:
Ամփոփելով խոսքս՝ ցանկանում եմ բոլորիդ մաղթել նորանոր հաջողություններ, ձեռքբերումներ, բարի ճանապարհ և բարի վերադարձ: Մինչ նոր հանդիպում մայր հայրենիքում: Համահայկական վեցերորդ խաղերը հայտարարում եմ փակված»:
Միջոցառման ընթացքում կառավարության ղեկավարը հանձնել է Համահայկական խաղերի համաշխարհային կոմիտեի կողմից սահմանած հատուկ մրցանակներ՝ վեց անվանակարգերում: «Լավագույն պատվիրակություն» մրցանակին է արժանացել Մոնրեալ քաղաքի պատվիրակությունը (Կանադա), «Արդարացի խաղի համար» մրցանակին՝ Նիկոսիա քաղաքի պատվիրակությունը (Կիպրոս), «Մարզական ոգի և համբերություն դրսևորած պատվիրակություն» մրցանակին՝ Սպահան քաղաքի պատվիրակությունը (Իրան), «Համահայկական վեցերորդ խաղերի հայտնություն» մրցանակին՝ Մուշի պատվիրակությունը և «Համահայկական վեցերորդ խաղերի գեղեցկուհի» է հայտարարվել Դիանա Թումանովան (Թբ
------------------------------------------------------------------------------------
Թիմային հաշվարկով Երևանը զբաղեցրել է Համահայկական ամառային վեցերորդ խաղերի առաջին հորիզոնականը
Համահայկական ամառային վեցերորդ խաղերի փակման հանդիսավոր արարողության շրջանակում Համահայկական խաղերի դրոշը ի պահ է տրվել Երևանին, որը հանձնվել է քաղաքապետ Տարոն Մարգարյանին: Օգոստոսի 2-ից 13-ն անցկացվող մարզական այս խոշոր ստուգատեսը միավորել էր աշխարհի 36 երկրի 175 քաղաքներից ժամանած 6352 մարզիկների: Խաղերի փակման հանդիսավոր արարողությանը ներկա են գտնվել նաև ՀՀ վարչապետ Հովիկ Աբրահամյանը, Համահայկական խաղերի համաշխարհային կոմիտեի նախագահ Իշխան Զաքարյանը, ՀՀ սպորտի և երիտասարդության հարցերի նախարար Գաբրիել Ղազարյանը, բազմաթիվ երևանցիներ ու մայրաքաղաք այցելած հյուրեր:
Ողջունելով և շնորհավորելով Համահայկական ամառային վեցերորդ խաղերի մասնակիցներին` քաղաքապետ Տարոն Մարգարյանը ընդգծել է, որ համայն հայության մայրաքաղաք Երևանի դռները միշտ բաց են յուրաքանչյուր հայի առջև: Քաղաքապետը նաև նկատել է, որ մարզական այս մեծ տոնը հազարավոր հայերի համար դարձավ յուրօրինակ հնարավորություն ոչ միայն հայրենիք այցելելու, այլև նորանոր ընկերներ ձեռք բերելու:
«Երևանը հայտնի է իր ջերմությամբ ու հյուընկալությամբ, սակայն դուք հյուր չեք Երևանում այն բոլորիս տունն է, համայն հայության մայրաքաղաքը, որի դռները միշտ բաց են հայի համար: Վստահ եմ, որ սիրեցիք Երևանը, հիացաք նրա հայկական գեղեցկությամբ, գնահատեցիք մեր պապերից ու հայրերից ժառանգածը: Այսօր հայոց մայրաքաղաքի շենացման նվիրական գործին լծված է նոր սերունդը, երիտասարդությունը: Մասնակիցը դարձեք նաև դուք, որով և Երևանը առավել հոգեհարազատ կդառնա ձեզ: Երևանի քաղաքապետարանն արել էր հնարավորը Համահայկական խաղերի պատվիրակությունների, մեր հայրենակիցների առօրյան Երևանում գեղեցիկ դարձնելու համար, երեկոյան Երևանը վայելելու համար: Տոնական այս օրերին շատերդ միմjանց գտաք ու վերագտաք, խաղերից ու մրցակցությունից բացի, նաև միմյանց ճանաչեցիք ու արժևորեցիք: Այն առավել մեծ արժեք է դառնում, քանզի ձեր մտերմությունը կայացավ մայր հայրենիքում, քաղաքամայր Երևանում: Երևանյան ջերմությամբ ու սիրով շնորհավորում եմ բոլոր մասնակիցներին: Մենք հպարտ ենք աշխարհի հայ երիտասարդությամբ, նրանց նկատելի տաղանդով ու շնորհներով, մրցունակ ներուժով, ու նրանց մասնակցությամբ առավել շեն ու կայուն է լինելու մեր հայրենիքը, առավել հմայիչ` մեր մայրաքաղաքը: Բարի վերադարձ եմ մաղթում ամենքիդ: Երևանը միշտ սպասելու է ձեզ: Բարով գաք Երևան»,- ընդգծել է քաղաքապետը:
Մարզական այս խոշոր ստուգատեսին, ի դեպ, Երևանի շուրջ 500 մարզիկներից կազմված պատվիրակությունն ակտիվ մասնակցություն ունեցավ՝ ստանալով ամենաշատ պարգևները: Երևանյան թիմի մարզիկներն արժանացել են 51 ոսկե, 42 արծաթե և 47 բրոնզե մեդալների, ինչի շնորհիվ թիմային հաշվարկով Երևանը զբաղեցրել է Համահայկական ամառային վեցերորդ խաղերի առաջին հորիզոնականը:
Երևանի քաղաքապետարանի տեղեկատվության
և հասարակայնության հետ կապերի վարչություն
իլիսի):
