Բացել լրահոսը Փակել լրահոսը
A A

ՅՈՒՆԵՍԿՕ-ի համաժողովի մասնակիցներն այցելեցին Մայր Աթոռ

Քաղաքականություն
YNESKO

Յուլիսի 11-ին Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնի «Վաչէ եւ Թամար Մանուկեան» մատենադարանում ընդունեց ՅՈՒՆԵՍԿՕ-ի «Մշակութային քաղաքականութիւն, քաղաքականութիւն մշակոյթի համար» խորագրով միջազգային եռօրեայ համաժողովի մասնակիցներին: Հանդիպման սկզբում համաժողովի առաքելութեանն ու կարեւորութեանն անդրադարձաւ ՀՀ Մշակոյթի նախարար Յասմիկ Պողոսեանը: Այնուհետեւ միջազգային համաժողովի մասնակիցներին իր գնահատանքի եւ օրհնութեան խօսքն ասաց Ամենայն Հայոց Կաթողիկոսը՝ յաջողութիւն մաղթելով համաժողովի աշխատանքին: Վեհափառ Հայրապետը, կարեւորելով համաժողովի մասնակիցների այցը Մայր Աթոռ Սուրբ Էջմիածին, յոյս յայտնեց, որ այս համաժողովը պիտի լուրջ ներդրում ունենայ մշակութային ժառանգութեան պահպանութեան եւ պատշաճ խնամքի ապահովման գործում: Իր խօսքում անդրադառնալով մշակութային արժէքների պահպանութեան խնդրին՝ Ամենայն Հայոց Կաթողիկոսը դատապարտելի նկատեց ամէն տեսակի ոտնձգութիւն պատմական մեծարժէք ստեղծագործութիւնների եւ ժառանգութեան նկատմամբ: Հայոց Հովուապետը շեշտեց, որ մարդու կողմից ստեղծուած մշակոյթը լաւագոյնս վկայում է մարդ-Աստուած փոխյարաբերութեան մասին եւ այն, որ մարդ ստեղծուած է Աստծոյ պատկերով ու նմանութեամբ: Հայոց Հայրապետն ընդգծեց նաեւ, որ արարելն ամէնից կարեւոր շնորհներից մէկն է, որ Աստուած պարգեւել է մարդուն, եւ աւելացրեց, որ մշակոյթի հանդէպ ունեցած հոգածութիւնը սիրոյ մեծագոյն դրսեւորում է Ամենակարող Տիրոջ հանդէպ: Հանդիպմանը ներկայ էր Մայր Աթոռի Արտաքին յարաբերութիւնների եւ արարողակարգի բաժնի տնօրէն Տ. Նաթան արքեպիսկոպոս Յովհաննիսեանը: