A
A
Պատգամավորի վրա հարձակում կատարելու գործը քննող դատավորը հայտնի է
ԱԺ պատգամավոր Արամ Մանուկյանի վրա հարձակում կատարելու գործը կքննի Երեւանի Արաբկիր եւ Քանաքեռ- Զեյթուն վարչական շրջանների ընդհանուր իրավասության դատարանի դատավոր Լեւոն Ավետիսյանը։ Սակայն դատական նիստի օր դեռ նշանակված չէ։ Գործով մեղադրյալը 41-ամյա Արշակ Սվազյանն է։ Հիշեցնենք, որ դեկտեմբերի 11-ի երեկոյան, իր տան շքամուտքի մոտ հարձակման էր ենթարկվել Ազգային ժողովի «Հայ ազգային կոնգրես» խմբակցության քարտուղար Արամ Մանուկյանը` ստանալով մարմնական վնասվածքներ: Արշակ Սվազյանը մեղադրվում է դիտավորությամբ առողջությանը թեթեւ վնաս պատճառելու մեջ, որի առավելագույն պատժաչափը երկամսյա կալանքն է: Մեղադրյալը ստորագրությամբ ազատ էր արձակվել։ Հարվածելու պատճառը, ըստ Արշակ Սվազյանի, եղել էր այն, որ ԱԺ պատգամավորը հայհոյել էր Սերժ Սարգսյանին։