Պետբյուջեի ծախսերի 29 տոկոսը հատկացվել է սոցապ նախարարությանը
ՀՀ աշխատանքի և սոցիալական հարցերի նախարար Արտեմ Ասատրյանն այսօր ընդունեց Համաշխարհային Բանկի Եվրոպայի և Կենտրոնական Ասիայի սոցիալական պաշտպանության և աշխատանքի հարցերով ղեկավար Էնդրյու Մեսոնին և Համաշխարհային Բանկի հայաստանյան գրասենյակի ղեկավար Լորա Բեյլիին: Բարձր գնահատելով աշխատանքի և սոցիալական պաշտպանության ոլորտում իրականացվող բարեփոխումներին Համաշխարհային բանկի կողմից ցուցաբերված աջակցությունը՝ նախարարը ընդգծեց համատեղ իրականացված ծրագրերի դրական արդյունքները և հույս հայտնեց, որ առաջիկայում ևս կշարունակվի արդյունավետ համագործակցությունը: Նախարար Արտեմ Ասատրյանը ներկայացրեց նաև ՀՀ կառավարության նախանշած առաջնահերթությունները սոցիալական պաշտպանության ոլորտում` կարևորելով ՀՀ պետական բյուջեից ոլորտին հատկացվող ֆինանսական միջոցների արդյունավետ, հասցեական և առաջին հերթին գնահատված կարիքին համապատասխան աջակցության տրամադրումը` ներդրվող ինտեգրված սոցիալական ծառայությունների համակարգի շրջանակներում: «Աշխատանքի և սոցիալական պաշտպանության ոլորտին ՀՀ պետական բյուջեի ծախսերի 29 տոկոսը հատկացնելը ևս համարում եմ ներդրում, որն ուղղված է մեր երկրի հիմնական կապիտալին` մարդուն»,- նշեց նախարարը: Էնդրյու Մեսոնը ողջունեց համակարգում իրականացվող բարեփոխումներն ու արձանագրված արդյունքները և նշեց, որ առանձնակի հաճելի և կարևոր է աշխատել այն գերատեսչության հետ, որի ծրագրերն ու աշխատանքները միտված են խոցելի խմբերի սոցիալական պաշտպանությանն ու զբաղվածության ապահովմանը: Նա վստահություն հայտնեց, որ Համաշխարհային բանկի հետ համագործակցության շրջանակներում նախարարության իրականացրած ծրագրերի արդյունավետությունն ու արձանագրված ձեռքբերումները կարող են լավագույն հիմքը հանդիսանալ առաջիկա ծրագրերի հաջող մեկնարկի և ակնկալվող նոր դրական արդյունքների համար: Համաշխարհային Բանկի հայաստանյան գրասենյակի ղեկավար Լորա Բեյլին իր հերթին կարևորեց իրականացվող աշխատանքների հաջող ընթացքի ապահովման նպատակով այլ երկրների դրական փորձի և Հայաստանի դրական փորձի փոխանակման անհրաժեշտությունը: Հանդիպման ավարտին պայմանավորվածություն ձեռք բերվեց առաջիկա օրերի ընթացքում շարունակել համատեղ մասնագիտական քննարկումները ՀՀ աշխատանքի և սոցիալական հարցերի նախարարության և Համաշխարհային բանկի ներկայացուցիչների մասնակցությամբ` ապահովելով նոր ծրագրի հաջող մեկնարկը:
