«Հայաստանի գլխավոր պատգամավորները պետք է լինեն բոլոր բնակիչները»
Հայաստանի դրական իմիջ արտերկրում ձևավորելու համար անհրաժեշտ է կազմակերպել դրական պրոպագանդա: Նման կարծիք այսօր WCFDavos/Yerevan ֆորումի շրջանակներում հայտնեց DonVAlley հարավաֆրիկյան մարքեթինգային ընկերության կառավարող տնօրեն Սոլլի Մոենգը: Ըստ նրա, շատ կարևոր է, որ երկրի բրենդավորման քաղաքականության հարցում բոլոր բնակիչները լինեն երկրի գլխավոր պատգամավորները, և իրենց ուղերձները համընկնեն երկրի գլոբալ ուղերձներին: Հասարակայնության հետ կապերի հայաստանյան ասոցիացիայի նախագահ Արա Սաղաթելյանը, դիմելով օտարերկրյա գործընկերներին, ընդգծեց, որ Հայաստանը մշտապես գտնվում է առնվազն հարևան Թուրքիայի և Ադրբեջանի բացասական քարոզչության և հակահայկական նախաձեռնությունների թիրախում: «Հայաստանում արվում է ամեն հնարավորը, որպեսզի նվազեցվի ագրեսիվ արտաքին տեղեկատվական հոսքերի բացասական ազդեցությունը հասարակության վրա: Բոլորիս համար խոսքի և մամուլի ազատությունն ու դրանց շարունակական զարգացումը այն արժեքներն են, որոնք առաջնային են ժողովրդական գործընթացների համատեքստում»,- նշեց նա: Ըստ Ա. Սաղաթելյանի, այս առումով կարևորվում է իշխանության և հասարակության, քաղաքական գործընթացներին մասնակցող բոլոր ուժերի միջև շարունակական երկխոսությունը ավանդական ԶԼՄ-ների և նոր հարթակների միջոցով: Վ. Բրյուսովի անվան լեզվաբանական համալսարանի «Տեղեկատվական և հանրային հաղորդակցության տեխնոլոգիաներ» գիտահետազոտական կենտրոնի դասախոս Աշխեն Բեգլարյանը նշեց, որ կատարված հետազոտության արդյունքում պարզվել է, որ վերջին տարիներին Հայաստանում մեդիա քաղաքական դիսկուրսները դիտարկում են երկրի զարգացման բևեռացված երկու վեկտորներ՝ Արևմուտք և Ռուսաստան: Արևմտյան վեկտորը իր հերթին բաժանվում է ԱՄՆ-ի և Եվրոպայի: «Թեև այս վեկտորները աշխարհաքաղաքական տիրույթում են, պետք է հաշվի առնել հասարակության պատրաստվածությունը և արձագանքը այս կամ այն ուղղության վերաբերյալ»,- նշեց նա: Երևանում մեկնարկել է Դավոսի Հաղորդակցության համաշխարհային ֆորումի տարածաշրջանային երկօրյա նիստը՝ WCVDavos/Yerevan՝ «Ճգնաժամից դեպի զարգացում՝ սնուցվելով հաղորդակցությամբ» խորագրով, որը կազմակերպվել է Հասարակայնության հետ կապերի հայաստանյան ասոցիացիայի (APRA) և Դավոսի հաղորդակցության համաշխարհային ֆորում ասոցիացիայի (World Communication Forum Association) կողմից:
