Զարուհի Փոստանջյանի նոր քաղաքական պլատֆորմը՝ «Երկիր ծիրանի» (տեսանյութ)
Կապանից բերված ծիրանենու ծաղկած այս ճյուղերը ազդարարում եւ խորհրդանշում են «Ժառանգություն» կուսակցության նախկին անդամ, ԱԺ պատգամավոր Զարուհի Փոստանջյանի՝ նոր քաղաքական պլատֆորմի՝ «Երկիր ծիրանի»-ի մուտքը քաղաքական դաշտ. «Ինչու ընտրեցինք այս անվանումը, քանի որ մենք խնդիր ունենք համախմբման մեր հայության ու վերադառնանք մեր ակունքներին: Մեր երկրի անունը ծիրանի է, այս ծառի պտուղը եւս կատարյալ է, ինչպես մեր հայրենիքը: Ծիրանը միակ պտուղն է, որ հավասարապես է բաժանվում, ու դա արդարության նշանն է, իսկ մենք՝ որպես ազգ, կեսից ավելին հայրենիքից դուրս ենք ապրում, բռնազվթման մեջ ենք ապրում: Ծիրանին մեր թագավորների գույնն է եղել: Այս ամենը գիտակցելով՝ ընտրեցինք այս ավանումը, որ այն լինի բոլորիս ամբիոնն ու կուսակցությունը»,- ասաց Երկիր ծիրանի»-ի նախաձեռնող խմբի անդամ Զարուհի Փոստանջյանը: Կուսակցությունը ֆինանսավորվելու է Սփյուռքից, իր մեջ կներառի նաեւ «Ժառանգություն» կուսակցության նախկին մի շարք անդամների, իսկ կարգախոսը կլինի «Դեպի Արարատ»-ը. «ՀՀ-ն ու ԼՂՀ-ն այն ծիրանի կորիզն են, որ հողում են ու դառնալու են մեծ ծիրանի ծառ: Իմ պապերը, որ Արեւմտյան Հայաստանից եկել են ՀՀ, առաջինը տնկել են ծիրանենի ու թթենի: Նրանք 90 տարեկան են, սակայն դեռ ապրում են: Մենք հավատում ենք մեր հավաքական ուժին»,- ասում է Զարուհի Փոստանջյանը: Նախաձեռնող խումբը ներկայացրեց իր հռչակագիրը՝ ընդգծելով, որ ՀՀ հիմնական ռեսուրսը մարդկային կապիտալն է, իսկ հայ ժողովրդի երաշխավորը ուժեղ ՀՀ-ն: «Երկիր ծիրանի»-ն ձգտելու է ձեւավորել անդրսահմանային քաղաքական հայ ազգ. «Պահանջում ենք՝ այն, էթնիկ հայերին, որոնք ապրում են արտերկրում, մասնակցեն ՀՀ նախագահի ու ԱԺ ընտրություններին, վերացնել նրանց նկատմամբ իրավական արգելքները»,- ասաց «Երկիր ծիրանի»-ի նախաձեռնող խմբի անդամ Սոնա ավագյանը: Նոր ուժը առաջիկայում մասնակցելու է քաղաքական բոլոր գործընթացներին, եւ իրենց պլատֆորմի հիմքը լինելու է հայրենադարձությունը, որի համար պետք է ստեղծվեն քաղաքական ու քաղաքացիական իրավունքներ: