Ծառուկյան դաշինքի ծրագրերը լավատեսական չեն, իրատեսական են. թեկնածու (տեսանյութ)
«Ծառուկյան դաշինքի» ներկայացուցիչներն իրենց քարոզարշավները սկսել են սահմանամերձ համայնքներից։ Ծառուկյան դաշինքի թիվ 4 ընտրատարածքի պատգամավորության թեկնածու Վահե Էնֆիաջյանը այսօրվա ասուլիսին նշեց, որ իրենց համար կարևոր է հիմնական ծրագրերը ներկայացնել բոլոր քաղաքներում և համայնքներում։ «Մենք ներկայացնում ենք հասարակության համար առաջնահերթություն ունեցող 15 հիմնադրույթներ՝ սոցիալական, տնտեսական, առողջապահության, սպորտի, մշակույթի, ռազմական արդյունաբերության տնտեսական զարգացման. չկա այնպիսի ոլորտ, որտեղ մենք մեր տեսլականը և մոտեցումները չներկայացնենք»,- շեշտեց նա։ Ըստ Վ. Էնֆիաջյանի, «Ծառուկյան դաշինքի» առանձնահատկությունն այն է, որ նրա բոլոր դրույթները և մոտեցումները իրենց մեջ իրատեսություն են պարունակում։ «Դա լավատեսություն չէ, այլ իրատեսություն»,- ասաց նա՝ հավելելով, որ իրատեսությունն է ժողովրդին ոգևորում, քանի որ սպասելիքների իրականացման հույս է ներշնչում։ Տնտեսական ծրագրերում պատգամավորության թեկնածուն առաջնահերթությունը տալիս է ՀՀ ընդերքի օգտագործման արդյունավետության բարձրացմանը, սոցծրագրերի, նվազագույն աշխատավարձի շեմի, կենսաթոշակների մակարդակի բարձրացմանը և ինդեքսավորմանը։
