Գնաճը պահպանվել է 4 ապրանքային խմբում (տեսանյութ)
2016թ-ի հունվար ամսին սպառողական շուկայում գրանցվել է էական բարձր գնաճ՝ 2,2 %, այնուհետ հաջորդ երեք ամիսներին գրանցվել է գնանկում։ Մասնավորապես փետրվար ամսին՝ 1,4 %, մարտ և ապրիլ ամիսներին՝ 0, 3 %-ի սահմաններում, այսինքն` վերջին երեք ամսվա ընթացքում ընդհանուր գնանկումը կազմել 2,1 տոկոս: Այս մասին այսօր լրագրողների հետ հանդիպման ժամանակ տեղեկացրեց ազգային վիճակագրական ծառայության նախագահի խորհրդական Գուրգեն Մարտիրոսյանը: Վերջինս նաև նշեց, որ 2016թ-ի ապրիլ ամսին մարտի նկատմամբ դիտարկված 13 պարենային ապրանքախմբերից 4 –ում գնաճը պահպանվել է: «Առավել բարձր գնաճ նշված ժամանակահատվածում արձանագրվել է միրգ ապրանքային խմբում՝ 4,7 %, գնաճ արձանագրվել է հացամթերքի գծով՝ 0,1 %, մսամթերքի գները աճել են 0,3 %, հրուշակեղենինը՝ 0,2 %-ով»,-ուսումնասիրության արդյունքները ներկայացրեց Գուրգեն Մարտիրոսյանը: «Ա1+»-ի այն հարցին, թե ինչ հանգամանքներով է պայմանավորված այդ գնաճը, պարոն Մարտիրոսյանն ի պատասխան ասաց, որ չի կարող ասել, քանի որ իրենք արձանագրում են միայն գնային փոփոխությունները: Մեր հաջորդ հարցին, թե մայիս ամսվա համար գնաճի՞, թե՞ գնանկման միտում կա, և մոտավոր ինչ տոկոսային հարաբերությամբ դա կարող է լինել, Գուրգեն Մարտիրոսյանը պատասխանեց. «Մենք առայժմ միմիայն որոշակի տեղեկատվություն ունենք մայիսի 1-ին դիտարկված ցուցանիշների վերաբերյալ, բայց այդ տվյալներն ամբողջությամբ ամփոփված չեն: Միայն բենզինի և դիզվառելիքի օրինակով կարող եմ ասել, որ դրանց գները ապրիլ ամսվա համեմատ ընդամենը մեկական դրամով են նվազել ՝ դա միջին հանրապետական գների մասով , իսկ մթերքի առումով դեռ հստակ թվեր ասել չեմ կարող»,-եզրափակեց նա: Մանրամասները՝ տեսանյութում