Սերունդները՝ իրենց պապերի նկարներով. «Անմահ գունդ» ակցիան (տեսանյութ)
Առաջին անգամ Հայաստանում այսօր անցկացվեց Հայրենական պատերազմում տարած մեծ հաղթանակին նվիրված՝ «Անմահ գունդ» հասարակական ակցիան: Այն ամեն տարի անցկացվում է աշխարհի մի շարք երկրներում: Այս ակցիաներում հենց պատերազմի վետերանների սերունդներն են՝ իրենց պապերի նկարները բարձրացրած անցնում են տոնական երթով:
Ակցիայի կազմակերպիչներն են Հայաստանի Կոմունիստական կուսակցությունը, ՀՀ Պատերազմի վետերանների միությունը, Ռուս-հայկական երիտասարդական միությունը, ռուսական մշակույթի «Հարմոնիա» միջազգային կենտրոնը, Հայաստանի խորհրդային սպաների միությունը։
Գեւորգն այսօր գլուխը բարձր՝ շարքերով իր ապուպապի նկարն է տանում: 16 տարեկան է, բայց սպասում է՝ երբ է զորակոչվելու տարիքը գալու, որ գնա ու ապացուցի՝ զինվորի հոգին իրեն գենետիկորեն է փոխանցվել. «Ամեն մարդ պիտի գնա իր հայրենիքը պաշտպանի, որ պատմության մեջ իր անունը մնա, Ղարաբաղն էլ պետք է ազատագրենք այդ թուրքերից»:
Ռոզա Հովհաննիսյանն էլ Թամանյանի դիվիզիայում կռված Թադեւոս Հովհաննիսյանի դուստրն է: Նա ամեն տարի Գյումրիից գալիս է Երեւան՝ Հաղթանակի օրը հենց հաղթանակի զբոսայգում նշելու համար:
Պապ ու թոռ Բաբաջանյան Սամվելները, նույնպես, ամեն տարի մասնակցում են հաղթանակի տոնին նվիրված միջոցառումներին: Ավագ Սամվելի հայրը մասնակցել է հայրենական մեծ պատերազմին, ինքը Ղարաբաղի ազատամարտի հերոս է; Կրտսեր Սամվելը պապերից հետ մնալ չի ուզում. «Գնալու եմ եւ պաշտպանելու եմ հայրենիքը թշնամուց»:
Հաղթանակի օրվան նվիրված տոնական երթի մասնակիցները հասան մինչեւ Հաղթանակի զբոսայգի: Ծաղիկներ դնելով անմար կրակին՝ հարգանքի տուրք մատուցեցին հայրենիքը պաշտպանած բոլոր հերոսներին՝ Հայրենական պատերազմից սկսած, մինչեւ ապրիլյան քառօրյա պատերազմ։
