Կոռուպցիա, անհավասար մրցակցություն, գրագիտության պակաս՝ բիզնեսում (տեսանյութ)
Հայ ձեռնարկատերերը իրենց սոցիալական պարտավորությունը դիտարկում են որպես ավելորդ բեռ։ Այնինչ դա միայն լավ առիթ է զարգացնելու սեփական ձեռնարկությունը։ Հենց այս կարծրատիպը կոտրելու համար Ֆրանս-հայկական առեւտրային միության եւ Գործատուների հանրապետական միությունը կազմակերպել են Ձեռնարկությունների սոցիալական պատասխանատվության հայկական առաջին կոնֆերանսը։ Ֆրանսիայի դեսպանության տնտեսական ծրագրերի համակարգող Ժան Միշել Գասպարյանը վստահ է՝ իրենց շրջակա միջավայրին ավելի ուշադիր լինելով՝ ձեռնարկատերերը մեծ բարձունքների կհասնեն. «Ձեռնարկությունների սոցիալական պատասխանատվությունը շատ կարեւոր հարց է։ Դա միայն շրջակա մրջավայրի պահպանումը չէ, կան նաեւ այլ սոցիալական խնդիրներ՝ աշխատանքի իրավունքը, աշխատողների վերապատրաստումը եւ աշխատանքի ընդունում»։ Գործատուների հանրապետական միության նախագահ Գագիկ Մակարյանի գնահատմամբ՝ կորպորատիվ պատասխանատվությունը Հայաստանում չի զարգանում մի քանի պատճառով. «Առաջինը՝ բիզնեսմենների գրագիտությունն է, մյուսը բիզնես միջավայրում տիրող իրավիճակն է՝ կոռուպցիա, անհավասար մրցակցություն, դրանք խանգարում են բարոյական նորմերին»։ Ձեռնարկությունների սոցիալական պատասխանատվության հայկական առաջին կոնֆերանսը տեղի կունենա հոկտեմբերի 4-ին, Ֆրանսիական համալսարանում։
