Շանթ Հարությունյանը դադարեցրել է հացադուլը
«Վարդաշեն» ՔԿՀ- ում գտնվող՝ «Ցեղակրոն» կուսակցության առաջնորդ Շանթ Հարությունյանը դադարեցրել է հացադուլը։ Այդ մասին «Ա1+»-ին հայտնեց ԱՆ ՔԿՎ հանրային կապերի բաժնի պետ Գոռ Ղլեչյանը։ Հացադուլը դադարեցրել է նաեւ նույն՝ խուլիգանության հոդվածով դատապարտված Վարդան Վարդանյանը, որը միացել էր ընկերոջ պահանջին՝ նոր խուց տեղափոխվելու հետ կապված։ «Այդ պահանջը բավարարվել է դեռ նախորդ շաբաթ,այլ պահանջներ մեզ չեն ներկայացվել», - հայտնեց Գոռ Ղլեչյանը։ Հացադուլից դուրս եկած Շանթ Հարությունյանի եւ Վարդան Վարդանյանի առողջական վիճակը բավարար է։ Հիշեցնենք, որ 2013թ նոյեմբերի 5-ի դեպքերից հետո 6 տարվա ազատազրման դատապարտված Շանթ Հարությունյանը հացադուլի ընթացքում ցանկություն էր հայտնել հանդիպել Սեյրան Օհանյանի եւ Վլադիմիր Գասպարյանի հետ՝ «պետության անվտանգության հետ կապված հարցով»։