Ջհանգիրյանը չօգնեց Փոստանջյանին. ՀՀԿ-ն հաղթեց (տեսանյութ)
ԱԺ Պետաիրավական հարցերի մշտական հանձնաժողովում այսօր եզրափակիչ ելույթների ժամանակ Զարուհի Փոստանջյանը հայտարարեց, որ ՀԱԿ պատգամավոր Գագիկ Ջհանգիրյանը, ըստ էության, աջակցեց, անգամ հավելյալ գովերգեց իշխանության թեկնածու Արման Թաթոյանին: Իսկ դիմելով ՀՅԴ-ին՝ ասաց. «Դուք դեռ ընդդիմություն եք, սակայն իշխանության թեկնածուին էլ եք կողմ քվեարկելու»: «Տիկին Փոստանջյան, դեռ օմբուդսմեն չեք, սակայն ամեն վայրկյան խախում եք օրենքը, վիրավորում եք ձեր գործընկերներին: Ախր, ինչ կա մենք էլ որ ասենք, չի լինի, էլի»,- ռեպլիկ արեց հանձնաժողովի նախագահ Հովհաննես Սահակյանը: Արձագանքեց նաեւ ՀՅԴ պատգամավոր Արծվիկ Մինասյանն՝ ասելով. «Առաջին դեպքը չէ, որ տիկին Փոստանջյանը կաղում է պարզ թվաբանությունից, առաջին դեպքը չէ, որ մարդուն արժեւորելուց ստանում ես ի պատասխան վիրավորանք: Տիկին Փոստանջյան, դուք փորձում եք ձեր մրցակիցների հետ բանավիճել՝ օգտագործելով այլ անձանց: Ձեր խորհուրդները պահեք ձեզ: Դա չի նշանակում, որ իմ քվեարկությունը որեւիցե կերպ փոխվելու է: Այ աղջիկ, ծառայություն մատուցողը դուք եք»: Արդյունքում Զարուհի Փոստանջյանը ստացավ 5 ձայն: «Իր օգտին քվեարկեց նաեւ Զարուհի Փոստանջյանը, սա ֆիքսենք»,- հայտարարեց Հովհաննես Սահակյանը: Ձեռնպահ, դեմ ձայներ չեղան: Նարեկ Ալոյանին կողմ քվեարկեց երկու պատգամավոր, իսկ Արման Թաթոյանի օգտին եղավ յոթ կողմ, չորս դեմ: Էդմոն Մարուքյանն ու Զարուհի Փոստանջյանը կոչ արեցին նորից քվեարկություն անել, քանի որ դեմ, ձեռնպահ ձայներն անտեսվեցին: Քվեարկությունը նույն կերպ կրկնվեց՝ որեւէ փոփոխություն չեղավ: Ի դեպ, Զարուհի Փոստանջյանի ամփոփիչ ելույթի ժամանակ Գագիկ Ջհանգիրյանը հեռացավ։
