«Սոցիալական աշխատողի ինստիտուտը թույլ է». Սոցապ նախարար
Սոցիալական ծառայությունների տարածքային կենտրոնների նկատմամբ հասարակության վերաբերմունքը բավականին բարելավվել է։ Այսօր համալիր սոցիալական ծառայությունների նոր մոդելի շուրջ ծավալված քննարկումից առաջ լրագրողներին ասաց ՀՀ աշխատանքի և սոցիալական հարցերի նախարար Արտեմ Ասատրյանը։ Նա հիշեցրեց, որ 2000 թվականից ի վեր Հայաստանում բարեփոխումներ են իրականացնում սոցիալական ծառայությունների մատուցման համակարգում։ Փորձարկվել են 19 տարածքային կենտրոններ, որոնցում մեկտեղված են բոլոր սոցիալական ծառայությունները։ «Այս պահին կարող եմ ասել, որ դեռևս թույլ է տուն այցեր իրականացնող սոցիալական աշխատողի ինստիտուտը»,- ասաց նախարարը՝ հավելելով, որ այս տարվա բյուջեում նմանաբնույթ ծախսերի փոխհատուցումը կատարելու համար միջոցներ են հատկացվել։ Արտեմ Ասատրյանի համոզմամբ՝ այս հանգամանքը էապես փոխելու է իրավիճակը։ Լրագրողները նաև հարց բարձրացրեցին սոցիալական աշխատողի ցածր աշխատավարձի մասին, նախարարը նշեց. «Նման խնդիր կա, սակայն 2014թ. հուլիսի 1-ից ներդրվելու է միասնական համակարգ աշխատանքի վարձատրության պետական ծառայության համակարգում, այդ առումով էապես բարձրացվելու է նաև սոցիալական աշխատողների աշխատավարձերը։ Ամենակարևորը այն է, որ միևնույն աշխատանքը կատարող տարբեր սոցիալական աշխատողներ նույն չափով վարձատրվեն, ինչը դեռևս այդպես չէ։ Այսինքն` կախված նրանից, թե աշխատողը, որտեղ է իր գործունեությունը ծավալում՝ պետական մարմնում, թե տեղեկան ինքնակառավարման մարմնում, աշխատանքի վարձատրության տարբերություններ կան»։ Նշենք, որ միջոցառումը կազմակերպել էր ՀՀ աշխատանքի և սոցիալական հարցերի նախարարությունը՝ ԱՄՆ ՄԶԳ-ի կողմից ֆինանսավորվող Կենսաթոշակային բարեփոխումների իրականացման ծրագրի հետ միասին։
