Տարոն Մարգարյանին պաշտպանում են լրագրողներից (տեսանյութ)
Քաղաքապետ Տարոն Մարգարյանի գիտական թեզի պաշտպանությունն այսօր Տնտեսագիտական համալսարանի շրջակայքում լուրջ իրարանցում է առաջացրել։ Լրագրողներին չեն թույլատրել մասնակցել թեզի պաշտպանությանը, իսկ Տարոն Մարգարյանին լրագրողներից պաշտպանելու գործին լծվել էին մի խումբ ուսանողներ, որոնք նույնիսկ հայհոյանքներ են տեղացել լրագրողների հասցեին։
Տարոն Մարգարյանի թեկնածուական ատենախոսության թեման է «Երևան քաղաքի սոցիալ-տնտեսական զարգացման հիմնախնդիրները»։
«Քաղաքապետ Տարոն Մարգարյանի այսօրվա պաշտպանության հետ կապված որոշ շրջանակներ, արդեն քանի օր է, կրքեր են փորձում բորբոքել»,- Ֆեյսբուքում գրել է ԿԳ նախարար Արմեն Աշոտյանը, որ հարկ է համարում այս կապակցությամբ նշել.
1. Հայաստանում գործում է գիտական աստիճանների շնորհման համապատասխան կարգ, որով կորոշվի այս, ինչպես մնացյալ բոլոր պաշտպանությունների համարժեքությունը:
2. «Գիտականության» շահարկումը արվում է բացահայտ քաղաքական նկատառումներով, ինչը անթույլատրելի է այս ոլորտի համար:
3. Պաշտպանությունները տեսաձայնագրվում են, ըստ կարգի: Որևէ բան թաքցնելու իմաստ այս դեպքում էլ չկա:
4. Որոշ լրատվամիջոցների դժգոհություններին ի պատասխան ուզում եմ հարցնել: Հայաստանում տարեկան միջինը 500 պաշտպանություն է լինում: Եթե «գիտության ջահակիր» եք, ապա քանիսի՞ն եք ցանկացել մասնակցել և լուսաբանել:
5. Քաղաքականացված բեմադրությունները պահեք կրթության և գիտության ոլորտներից հեռու:
Այս դեպքում էլ գիտական աստիճան շնորհելու հարցում ՀՀ ԿԳՆ-ն լինելու է օբյեկտիվ և անաչառ:
