Նյույորքյան բեմադրություն՝ Սոս Սարգսյանի հիշատակին
Նյու Յորքի Համազգայինի թատերախումբը բոլորեց իր 45- տարին։ Թատրոնի հիմնադիրն է թատերագիր, բանաստեղծ, ռեժիսոր եւ դերասան Հրանտ Մարգարյանը:
Այս տարիների ընթացքում թատերախումբը ներկայացրել է 153 բեմադրություն, որին մասնակցել են 389 դերակատարներ: Հրանտ Մարգարյանը հիմնադիրն է նաեւ Նյու Ջերսիի Համազգայինի մանկապատանեկան թատերախմբի:
Հոկտեմբերի 18- ին Նյու Յորքի Հայ Կենտրոնում ներկայացվեց հայրենի թատերագիր Սամուել Կոսյանի «Կյանքը վանդակի կողքով» պիեսը: Ներկայացման բեմադրող ռեժիսորն էր Հրանտ Մարգարյանը: Գլխավոր դերերում հանդես եկան Թորոս Թերվիզյանը (Չիկ), Հարություն Պարսումյանը(Պոչեկ), Գառնիկ Ներսիսյանը (Տեր), Մարիա Պարսումյանը(Փետրուհի) եւ Հակոբ Ներսիսյանը(թիկնապահ):
Ներկայացման ավարտից հետո շնորհավորական խոսք ասացին Աստղիկ Սեւակը, Ռուբեն Պարսումյանը եւ դոկտոր Տիգրան Կազանչյանը։
Նյու Յորքի Համազգայինի թատերախմբի նոր բեմադրությունը նվիրվում է հայ անվանի դերասան, ԽՍՀՄ եւ ՀՀ Ժողովրդական արտիստ, Երեւանի Համազգային թատրոնի հիմնադիր Սոս Սարգսյանի անմար հիշատակին:
Նոր ներկայացումն ընդունվեց ջերմությամբ:
Նյու Յորք
