Ռեստորանի PR ապահովողը մատուցողն է (տեսանյութ)
Գևորգ Կարապետյանը արդեն 10 տարի է մատուցող է աշխատում։ Այսօր իրեն համարում է իր գործի վարպետը, իսկ Երևանի պետական համալսարանի տնտեսագիտության առաջին կուրսում սովորելիս, այս աշխատանքը կատարում էր միայն ծախսերը հոգալու համար:
«Սկզբում ընդունվել էի որպես մատուցողի օգնական, իսկ այժմ ամբողջ հոլդինգի ավագ մատուցողն եմ», -ասում է Գևորգը:
Նա այսօր հսկում է բոլոր մատուցողների աշխատանքը և նոր աշխատողներին փոխանցում տարիների իր փորձը, քանի որ մատուցողի մասնագիտությունը հատուկ հմտություններ է պահանջում։
Թեեւ սկզբնական շրջանում ինքն էլ դժվարությունների է հանդիպել, սակայն Գևորգը հիշելու շատ բան ունի, որոնք հիմնականում կապված են բարձրաստիճան պաշտոնյանների հետ:
«Մեծ հուշեր կան, երբ Ժակ Շիրակը եկավ այցելեց մեզ, նրա հետ աշխատել եմ ես, նա մեծ ոգևորությամբ ընդունեց հայկական հյուրասիրությունը, երգ երաժշտությունը, հիշում եմ երբ հյուրասիրեց հայկական կոնյակը , նա ասաց, որ լսել է դրա մասին Շառլ Ազնավուրից», - հիշում է ավագ մատուցողը:
Գևորգի կարծիքով՝ մատուցողի հաջողության գրավականը բարեհամբյուր լինելն է:
Ավագ մատուցողի հետ համամիտ է նաև «Պրո-Սերվիսի» կենտրոնի համահիմնադիր Ալեքսանդր Մավիսակալյանը: Նրա կարծիքով մատուցողի մասնագիտությունը լուրջ մոտեցում է պահանջում և բարդ է:
«Եթե ափսե տանել բերելը ավելի հեշտ է սովորելը, ապա շփման ու մոտեցման եղանակները պահանջում են լուրջ մոտեցում», - տեղեկացնում է պարոն Մավիսակալյանը:
Նրա կարծիքով այսօր հայաստանյան բազմաթիվ մատուցողները հաճախորդի հետ շփման եզրեր գտնելու խնդիր ունեն:
«Մատուցողների մեծ մասը չեն հասկանում, որ հաճախորդներին չպետք է ցույց տան, որ իրենք ունեն անձնական խնդիրներ: Մեր հիմնական խնդիրը անձնական իրավիճակն է, որ չեն սիրում ժպտալ, չեն կարողնում շփվել, չեն կարողանում հարաբերություններ հաստատել», - նշեց Ալեքսանդր Մավիսակալյանը:
Նա նաև հիշեցրեց է, որ ժպիտ չտեսնող հաճախորդը, երբեք չի վերադառնա նույն վայրը:
