Պահանջում են ռեկտորի օգնականի հրաժարականը (տեսանյութ)
Այսօր ԵՊՀ ուսանողները բուհի բակում ստորագրահավաք են կազմակերպել՝ ռեկտորի օգնական Գևորգ Մելքոնյանին աշխատանքից հեռացնելու համար։ Ուսանողները նշում են, որ նրա երեկվա արարքը գռեհկություն է հիշեցնում և արժանի է խիստ պատժման։
Հիշեցնենք, որ երեկ ԵՊՀ դիմաց ԵՊՀ ռեկտորի օգնականը "զորքը բեր առաջ, ախալքալակցիներին բեր առաջ" արտահայտությամբ, ախլքալաքցի տղաների օգնությանն է դիմում՝ դասադուլ հայտարարած ուսանողներին բակից հեռացնելու նպատակով։ Վերջիններս էլ հայհոյում են հավաքվածներին, այդ թվում նաև աղջիկներին։
Գևորգ Մելքոնյանն «Ա1+»-ին հայտնեց, որ իր խոսքերը կոնտեքստից կտրել են։ Ինքն ամեն ինչ արել է, որպեսզի ԵՊՀ ուսանողների դասերը բնականոն հունով ընթանան։
ԵՊՀ բակում ուսանողներին օգնում էին և իրենց հերթին ստորագրահավաք էին անցկացնում նաև մի խումբ քաղաքացիական ակտիվիստներ։
ԵՊՀ կիրառական մաթեմատիիկայի և ինֆորմատիկայի ուսանողները նշեցին, որ իրենց այսօրվա դասադուլը որևէ քաղաքական նպատակ չունի, միակ նպատակը՝ Գևորգ Մլքոնյանին պատժելն է ։
Այսօր ԵՊՀ բակում էր նաև Երևանի փոխոստիկանապետ Վալերի Օսիպյանը, ով չցանկացավ մեկնաբանել ուսանողների արդեն 4-րդ օրն իրականացվող դասադուլը, միայն նշեց, որ դասադուլ հայտարարած այս ուսանողների ծնողները մեծ դժվարությամբ են գումար վաստակում և ճիշտ չէ դասապրոցեսներին չմասնակցելը։
Պարոն Օսիպյանի խոսքերով մեզ պետք են կիրթ և դաստիարակված քաղաքացիներ։
