«Մահը նվեր կլիներ Սաֆարովի համար»
Հրեական համայնքի ղեկավարը չի ողջունում Ռամիլ Սաֆարովին սպանելու կոչերը
«Կան պատժի ավելի սարսափելի միջոցներ, քան ակնթարթային մահը, դա մեծ նվեր կլիներ նրա համար, նա պետք է տառապի»,-ասում է Ռիմա Վարժապետյանը։
Նա միաժամանակ ողջունում է 1972-ին Մյունխենի հրեա օլիմպիականների սպանության դիմաց Իսրայել պետության ձեռնարկած գործողությունները, որի արդյունքում սպանվեցին ահաբեկչության մասնակիցներն ու կազմակերպիչները։
Հրեական համայնքի ղեկավարը ողջունում է Իսրայելի պաշտոնական մոտեցումը՝ մեկ հրեայի կյանքն անչափ թանկ է . «Դուք գիտեք բազմաթիվ օրինակներ, թե մեկ հրեային փրկելու համար քանի մարդ են փոխանակել»։
Տիկին Վարժապետյանի կարծիքով՝ Հայաստանը պետք է ուժ ցույց տա եւ օգտվի առիթից ճանաչել տալու ցեղասպանությունը
«Եթե Հայաստանը հասնի Սաֆարովի հանդեպ, ինչպես դուք եք ասում, հատուցման, դա կլինի հայերի ցեղասպանության ճանաչմանն ուղղված լուրջ քայլերից մեկը»,- «Ա1+»-ին ասաց նա։
Ի դեպ, տիկին Վարժապետյանը Սաֆարովի արտահանձնման մեջ տեսնում է միայն երկու երկրի՝ Ադրբեջանի եւ Հունգարիայի մեղքը։ Միաժամանակ կարծում է, որ պետք է պատժվեն նաեւ նրանք, ովքեր խրախուսում են այդ համաներումը։ Ինչպե՞ս պիտի պատժվեն՝ տիկին Վարժապետյանը չի կարող ասել. «Դա ես ոչ մեկին չեմ ասի, դուք ինքներդ կտեսնեք»։
