ՀՀԿ -ում մինչեւ նոյեմբեր նիստ չի լինի
Հանրապետական կուսակցության կենտրոնական շենքում շինարարական աշխատանքներ են ընթանում։ Բոլոր հարկերում տարատեսակ շինանյութ է, շինարարական աղբ եւ փոշի։ Փոխվում էին նաեւ շենքի հոսանքալարերը։
Այստեղ բացի շինարարներից, կուսակցության որեւէ անդամ չկար։ Միջանցքում մեզ հանդիպած միջին տարիքի տղամարդը տեղեկացրեց, որ շինարարական աշխատանքները նախատեսում են ավարտել նոյեմբեր ամսին։
Իսկ ՀՀԿ խմբակցության քարտուղար Հովհաննես Սահակյանն «Ա1+»-ին հայտնեց, որ դա չի կարող խոչընդոտ հանդիսանալ կուսակցության գործունեության համար, քանի որ կուսակցությունը տարբեր տարածքային կառույցներ ունի։
Նրա խոսքերով՝ շենքը բավականին վատ վիճակում էր, քանի որ երկար ժամանակ նորոգման աշխատանքներ չէին կատարվել, իսկ մայիսի 22-ին տեղի ունեցած հրդեհից հետո շենքն ավելի անբարեկարգ էր դարձել։
Հիշեցնենք, որ հրդեհից հետո հայտարարվեց, թե վնասվել է միայն տանիքը։
Իսկ թե ինչքան գումար էր նախատեսված շենքի վերանորոգման համար, Հովհաննես Սահակյանը չգիտ։ «Դա չի մտնում իմ իրավասության մեջ»,-եզրափակեց նա։
