«Ի հեճուկս» անձրևի
Չնայած երբեմն-երբեմն իրեն հիշեցնող անձրևին՝ Վահան Տերյանի արձանի մոտ հավաքված գրողները, գրականագետները, ուսանողները և ուղղակի հետաքրքրասեր անցորդները տուն գնալու միտք կարծես թե չունեին:
Մայիսի 17-ին ժամը 17:00-ից տերյանական կիսամռայլ եղանակը իսկական պոետական ֆոն ստեղծեց բանաստեղծ Հուսիկ Արայի «Աստծո հետ խոսելու ժամանակը» չորրորդ բանաստեղծական ժողովածուի շնորհանդեսի համար: Գիրքը հրատարակվել է «Ծիծեռնակ» հրատարակչության կողմից պետական աջակցությամբ:
Հավաքվածներից մի քանիսը, ինչպես երիտասարդ գրականագետ Արքմենիկ Նիկողոսյանը, հեղինակի՝ մամուլի միջոցով արդեն իսկ սիրված բանաստեղծություններից ընթերցեցին: Գրքում, Հուսիկ Արայի խոսքերով, մեր ապրած ժամանակն է, մեր հետ քայլող քաղաքի յուրովի ըմբռնումը՝ նոր բովանդակության մեջ:
«Ես յոթանասուն տոկոսով գոհ եմ ստացված արդյունքից»,-անկեղծանում է բանաստեղծը, իսկ մնացածը թողնում ընթերցողին:
