Լեւոն Աղասյանը մտավ եզրափակիչ
Հայաստանի եռացատկորդ Լեւոն Աղասյանը ֆրանսիական Լիլ քաղաքում տեղի ունեցող աշխարհի աթլետիկայի պատանեկան առաջնությունում հաղթահարելով նախնական փուլը, մտել է եզրափակիչ եւ շարունակում է պայքարը մեդալների համար:
16-ամյա մեր մարզիկը որակավորման մրցումներում ցույց է տվել 15.22 մ արդյունք եւ իր խմբում զբաղեցրել 4-րդ տեղը: Այսօր 12 ուժեղագույն եռացատկորդները կվիճարկեն երեք մեդալները:
Մեր մյուս մասնակիցները չկարողացան հաղթահարել առաջին արգելքը եւ դուրս մնացին հետագա պայքարից: Սարգիս Կոստանդյանը 100 մ վազքի մրցումներում 11.19 վրկ արդյունքով իր խմբում զբաղեցրել է վերջին` 8-րդ տեղը: Սամվել Գրիգորյանը 400 մ վազքում ցույց է տվել 4-րդ արդյունքը (49.64):
Դիանա Խուբեսերյանը 100 մ վազքում գրավել է 5-րդ տեղը` 12.64 վրկ, իսկ Սաթենիկ Հովհաննիսյանը հեռացատկի մրցումներում` 8-րդ տեղը` 5.76 մ:
