PMP® սերտիֆիկատի հիմնադիր Լի Լամբերտը Երեւանում կոնֆերանսի է մասնակցում
Project Management-ի համաշխարհային գուրու Լի Լամբերտը Հայաստանում է: Նա Երևանում մասնակցում է նախագծերի կառավարման ոլորտի տարվա կարևորագույն կոնֆերանսին։
PMP® սերտիֆիկատի հիմնադիր Լի Լամբերտին հարց է ուղղվում Project Management-ի կարեւորագույն գործիքների մասին։
Հաղորդակցությունը, - ասում է նա` ընդգծելով` հաջողության գաղտնիքը հենց լավ հաղորդակցության մեջ է։
1966թ.-ից ի վեր Լի Լամբերտը անփոխադրելի ներդրում ունի Project Management-ի ոլորտի զարգացման գործում, 57 տարվա ընթացքում իրականացրել է բազմաթիվ նախագծեր, կրթել ավելի քան 50,000 մասնագետների՝ 23 երկրներից: Նա «Project Management - The CommonSense Approach» համաշխարհային բեսթսելլերի հեղինակն է:
Կոնֆերանսի կազմակերպիչ, Նախագծերի կառավարման ինստիտուտի հայաստանյան մասնաճյուղի` PMI Armenia-ի փոխնախագահ Աստղիկ Սահակյանը հիշում է, որ երբ 2014թ. -ին ինքը ստացավ PMP® սերտիֆիկատ, Հայաստանում առավելագույնը հինգ սերտիֆիկացված մասնագետ կար։
Այսօր նման սերտիֆիկատ ունեցողների թվով Հայաստանն առաջատար է տարածաշրջանում` հաշվի առնելով բնակչության թիվը։ Իհարկե, ըստ Աստղիկի, սերտիֆիկատ ունենալը դեռ չի նշանակում լավ մասնագետ լինել, բայց այն, իրոք, մրցունակ է դարձնում լավ մասնագետին։
Այսօրվա կոնֆերանսին նախագծերի կառավարման իրենց փորձն էին ներկայացնում պրոֆեսիոնալներ` ինչպես Հայաստանից, այնպես էլ` արտերկրից։
Օրվա երկրորդ կեսին Լի Լամբերտը 4-ժամյա ինտենսիվ աշխատաժողով (workshop) է անցկացնելու հայ մասնագետների համար՝ ներկայացնելով իր փորձը, վերլուծելով կոնկրետ օրինակներ ու պատասխանելով բազմաբնույթ հարցերի:
Մասնակիցները կստանան վկայականներ PMP® սերտիֆիկատի հիմնադրի ստորագրությամբ:
