Յակոբսոնի անվան բալետի թատրոնը առաջին անգամ հանդես կգա Հայաստանում

Աշխարհահռչակ Սանկտ Պետերբուրգի Լեոնիդ Յակոբսոնի անվան բալետի պետական ​​ակադեմիական թատրոնը` մարտի 3-ին և 4-ին առաջին անգամ հանդես կգա Հայաստանի օպերայի և բալետի ազգային թատրոնում: Յակոբսոնի անվան բալետի թատրոնի արտիստները կներկայացնեն Լ. Մինկուսի ԴՈՆ ԿԻԽՈՏ բալետային ներկայացումը Հայաստանի օպերայի և բալետի ազգային թատրոնի նվագախմբի հետ միասին, դիրիժոր՝ Իգոր Վլադիմիրովիչ Տոմաշևսկի:

Սանկտ Պետերբուրգի Լեոնիդ Յակոբսոնի անվան բալետի պետական ​​ակադեմիական թատրոնը եզակի արտիստական ​​կոլեկտիվ է։ Թատրոնը ունի 50-ամյա պատմություն և պատվով կրում է 20-րդ դարի ռուս ականավոր պարուսույցի անունը։ Այսօր Սանկտ Պետերբուրգի Լեոնիդ Յակոբսոնի անվան պետական ​​ակադեմիական բալետի թատրոնը երկրի ամենաուժեղ բալետային խմբերից է, Սանկտ Պետերբուրգի «Ոսկե սոֆիտ» բարձրագույն թատերական մրցանակի դափնեկիր է, Ռուսաստանի ազգային թատերական «Ոսկե դիմակ»-ի մրցանակակիր:

Հյուրախաղերն անցկացվում են Սանկտ Պետերբուրգի մշակույթի կոմիտեի աջակցությամբ։

Ներկայացման բեմադրությունը՝ Մարիուս Պետիպայի, Ալեքսանդր Գորսկու, լիբրետոն և  վերաբեմադրությունը՝ Յոհան Կոբբորգի,  բեմադրության և զգեստների նկարիչ՝ Ժերոմ Կապլան, լուսային ձևավորումը՝ Վինսենթ Միլլեյի, դիրիժոր՝ Իգոր Տոմաշևսկի, Հայաստանի օպերայի և բալետի ազգային թատրոնի սիմֆոնիկ նվագախումբ: