Խոստանում են անակնկալ (տեսանյութ)
«Լինել հանրությանը հասանելի» կարգախոսով, շուրջ հինգ տասնյակ պետական ու հասարակական մշակութային կազմակերպություններ` թանգարաններ, պատկերասրահներ, թատրոններ, համույթներ, կինոփառատոններ մասնակցեցին «ART EXPO-2011»-ին: Այն արդեն 3-րդ տարին է իրականացվում` Մշակույթի նախարարության նախաձեռնությամբ:
Ներկայանալ, հաշվետու լինել ու ավելի պարտավորված առաջ գնալ: Համազգային թատրոնի տնօրեն Վարդան Մկրտչյանի խոսքով` սա է «ART EXPO-2011»-ին մասնակցության նպատակը: Ինչ վերաբերվում է ծրագրերին` Համազգայինը, որն ի դեպ, այս տարի կնշի իր 20-ամյա հոբելյանը, երկու պրեմիերա է պատրաստում:
Մայր թատրոնի դերասաններն էլ, ըստ դերասան Արամ Հովհաննիսյանի, լավատեսությամբ զինված նոր ներկայացումներ են բեմադրում ու սպասում նոր ղեկավարի:
«Երևանյան հեռանկարները» իրենց առաջիկա ծրագրերը կներկայացնեն ասուլիսին, մոտ ապագայում: Շադեի, Փոլ Մաքարտնիի ու Էլթոն Ջոնի հյուրախաղերի մասին քաղաքում պտտվող լուրերը «Երևանյան հեռանկարներ միջազգային 12-րդ փառատոնի» գլխավոր մենեջեր Սոնա Հովհաննիսյանը պաշտոնապես չհաստատեց:
Հայաստանի պետական ֆիլհարմոնիկ նվագախմբի ծրագրերը ներկայացրեց փոխտնօրեն Դավիթ Թերզյանը: Այս տարի բացի արդեն ավանդական դարձած 5-րդ երաժշտական միջազգային փառատոնի անցկացումից, պատրաստում են անակնկալ`օպերային մի ներկայացում: Իսկ թե ինչ ներկայացում, կհայտարարեն ավելի ուշ:
