Ժողովուրդը նախազգուշացված է, մնացածն էլ կբանակցեն փակ ռեժիմով՝ շահագրգիռ կողմերի հետ․ Արման Մելիքյան (տեսանյութ)
Աջակցիր «Ա1+»-ին«Ես կարծում եմ, Ադրբեջանը կցանկանա լրացուցիչ մեկ այլ ճանապարհ ունենալ, որը գուցե կապի Նախիջևանը, Շուշին Բաքվին։ Եվ գուցե այդ ճանապարհն ինչ-որ տեղ անցնի Սյունիքով։ Իսկ դա խնդիր է, որը լուրջ ծանրութեթև անելու հիմքեր է տալիս»,- «Ա1+»-ի հետ զրույցում ասում է արտակարգ և լիազոր դեսպան, Արցախի նախկին արտգործնախարար Արման Մելիքյանը՝ անդրադառնալով Ադրբեջանը Նախիջևանի հետ կապող ճանապարհի մասին՝ ՌԴ արտգործնախարար Սերգեյ Լավրովի հայտարարությանը։
Ա․Մելիքյանը գտնում է, որ, ամեն դեպքում, այդ ճանապարհը պետք է լինի ՀՀ վերահսկողության տակ։ Ինչ վերաբերում է Հայաստանը Արցախին կապող նոր ճանապարհի կառուցմանը, որի արդյունքում, 2020թ․նոյեմբերի 9-ի հայտարարության շրջանակներում, Լաչինի միջանցքի հետ միասին Աղավնոն էլ կարող է անցնել Ադրբեջանի վերահսկողության ներքո, ասում է, եթե այդ գյուղից հայ բնակչությունը հեռանա, այնտեղ անմիջապես կհայտնվեն ադրբեջանցիներ։ «Միգուցե նաև Աղավնոն վերածվի ռազմական արգելափակոցի»,- հավելում է նա։
Անդրադառնոլով Լավրովի այն հայտարարությանը, հետո նաև դրա սրբագրմանը, թե Փառուխի հարցը կլուծվի Ադրբեջանի ու Հայաստանի միջև սահմանագծման և սահմանազատման արդյունքում՝ Ա․Մելիքյանն ասում է, թե ՌԴ արտգործնախարարի խոսքերը ցույց են տալիս, որ ռուսական կողմը Փառուխի միջադեպը փակված է համարում և դրան վերադառնալու իմաստը չի տեսնում։ «Կպահպանվի այս իրավիճակը, և ռուսներն այն փոխելու քայլեր չեն անի։ Եթե վաղն էլ ինչ-որ բան անցնի Ադրբեջանին, այդպես էլ կմնա։ ՌԴ արտգործնախարարը գալիս է Երևան և Երևանում այդ հարցը փակում են»,- ասում է Ա․Մելիքյանը։
Ինչ վերաբերում է Արցախի կարգավիճակին և վարչապետ Նիկոլ Փաշինյանը այն հայտարարությանը, թե միջազգային հանրությունն ակնկալում էր կարգավիճակի նշաձողի իջեցում, ասում է․ «Ժողովուրդը նախազգուշացված է, մնացածն էլ կբանակցեն փակ ռեժիմով՝ շահագրգիռ կողմերի հետ»։
Մանրամասները՝ տեսանյութում։