Ինչպես Հայաստանում տուբերկուլոզի հաստատված դեպքերը դարձան 346 (տեսանյութ)
Աջակցիր «Ա1+»-ին50-ամյա տղամարդը մեկն է այն 63 հիվանդներից, որոնք ստացիոնար բուժում են ստանում Թոքաբանության ազգային կենտրոնում։
«Վարակվելը պատահական է եղել, գրիպ եմ ընկել, հետո գնացել եմ ստուգվել, ուղարկել են այստեղ, ասել են,որ էդ հիվանդությունն է, հիմա եկել, բուժվում եմ»,- պատմում է տղամարդը։
Կարճ ժամանակում նրա մոտ դրական դինամիկա է նկատվում։
«Արդեն հինգ օր ա, տարբերությունը շատ ա, զգում եմ, որ դեպի լավն եմ գնում։ Փոփոխություններ շատ կան»,-ասում է տղամարդը։
Թե ումից և ինչպես է վարակվել, ինքն էլ չգիտի։ Հոսպիտալացված քաղաքացին անկաշկանդ շրջապատին հայտնել է, որ վարակվել է տուբերկուլոզով, ասում է՝ նախկին կարծրատիպերը վաղուց կոտրվել են։
«Սաղի հետ էլ կարող է պատահի, աշխատում եմ իրանք էլ են աշխատում, մարշուտակ են նստում, ինչ իմանա ով ինչ հիվանդություն ունի»,- նկատում է քաղաքացին։
«Տուբերկուլոզը հանդիսանում է անթրոպոնիզ հիվանդություն՝ այսինքն փոխանցվում է մարդուց մարդուն օդակաթիլային ճանապարհով, ախտահարում է մեծ մասամբ թոքերը և մյուս օրգան-համակարգերը»,-պարզաբանում է ՀՀ ԱՆ Թոքաբանության ազգային կենտրոնի տնօրեն, թորակալ-վիրաբույժ Արտակ Մանուկյանը։
Տուբերկուլոզի առաջին ախտանիշներն են՝ հազ, արյունախում, երբեմն ջերմության բարձրացում։ Մասնագետները հորդորում են նման դեպքերում անհապաղ դիմել բժշկի
«Պետք է նշեմ, որ ՀՀ-ում հակատուբերկուլոզային բուժումն անվճար է։ Եվ իրականացվում է պետպատվերի շրջանակներում։ Եվ անվճար է ոչ ՀՀ քաղաքացի հանդիսացող անձանց համար»,- նշեց թորակալ-վիրաբույժ Արտակ Մանուկյանը։
Հանրապետության առաջնային օղակի բոլոր բուժ հաստատությունները՝ պոլիկլինիկաներն ունեն տուբերկուլոզային կաբինետներ։
«Երբ հիվանդի մոտ ախտորոշվում է տուբերկուլոզային հիվանդություն, հիվանդն ուղեգրվում է ԹԱԿ, կենտրոնում հստակ որոշվում է հիվանդի բուժման սխեման։ Եթե բացիլակիր է, հոսպիտալացվում է»,-ասում է բժիշկը։
Միս, թարմ կաթնամթերք,ծովամթերք, միրջ-բանջարեղեն ։ Սրանք տուբերկուլոզով հիվանդ պացիենտների սննդակարգի հիմնական բաղադրիչներն են։
«Տուբերկուլոզով վարակվելիս տեղի է ունենում մարմնի կշռի կտրուկ անկում։Այդ իսկ պատճառով ՏՈՒԲ-ով հիվանդ տալիս են բարձր կալորիականությամբ սննդամթերք՝ օրական 3 անգամյա ռեժիմով»,- նշում է Թոքաբանության ազգային կենտրոնի վարակի հսկողության բաժնի ղեկավար Նաիրա Միքայելյանը։
Տուբերկուլոզով չհիվանդանալու համար պատասխանատուները հորդորում են առողջ ապրելակերպ վարել՝ զբաղվել սպորտով, հնարավորինս հաճախ մաքուր օդ շնչել, սնվել առողջ և ամենակարևորը՝ չծխել։
Հայաստանում տուբերկուլոզ հաստատված և բուժվող պացենտների թիվը 346 է։
Մանրամասները՝ տեսանյութում։
