Ինչպե՞ս է վերաբերվում ՌԴ-ն Ադրբեջանի 5 առաջարկներին (տեսանյութ)
Աջակցիր «Ա1+»-ինԱյո, մենք անհանգստացած ենք այդ տարածաշրջանի և հայ-ադրբեջանական սահմանի մյուս հատվածների իրադրությամբ»․ այսպես արձագանքեց Ռուսաստանի արտաքին գործերի նախարարության մամուլի խոսնակ Մարիա Զախարովան լրագրողի այն հարցին, թե ինչպես է Ռուսաստանը գնահատում Բաքվի վերջին սադրանքները և ի՞նչ է արվում Լեռնային Ղարաբաղի բնակչության անվտանգության ապահովման, գազի ու էլեկտրականության վերականգնման համար։
Հայկ Խալաթյանը նաև հիշեցրեց, որ ադրբեջանցի զինծառայողները կանոնավոր կերպով կրակ են արձակում Արցախի գյուղերի վրա, մինչև անգամ կիրառելով ականանետեր և պահանջում լքել իրենց տները, ինչը լրագրողի խոսքով, 2020-ի Նոյեմբերի 9-ի պայամանավորվածությունների խախտում է։
Ռուսաստանի արտաքին գործերի նախարարության մամուլի խոսնակ Մարիա Զախարովան ընդգծեց, որ կրակի դադարեցման ռեժիմի հաճախակի խախտում սկսել են արձանագրել մարտի սկզբից ։ «Ռուսական խաղաղապահ կոնտինգենտը իր պատասխանատվության գոտում ձեռնարկում է համապատասխան միջոցներ կայունություն ապահովելու համար»,-նշեց Զախարովան։
«Այդ ջանքերի շնորհիվ Մարտի 13-ից զինված միջադեպեր չեն արձանագրվել։ Մենք կողմնակից ենք սահմանագծման և սահմանազատման գործընթացի շուտափույթ մեկնարկին և երկկողմանի հանձնաժողովի ստեղծմանը»,- նշեց Մարիա Զախարովան։
Նրա խոսքով՝ ռուսական կողմը տեղյակ է Արցախում հումանիտար ծանր վիճակի մասին՝
«Շփման մեջ ենք երկու կողմերի հետ, այդ խնդիրը լուծելու համար»,- վերահաստատեց նա։
Հայկ Խալաթյանի մյուս հարցին թե՝ Մոսկվայում Ադրբեջանի քայլերի մեջ տեսնու՞մ են արդյոք նպատակ, օգտվելու այն հանգամանքից, որ Ռուսաստանը հիմա հատուկ գործողությամբ է զբաղված Ուկրաինայում, Զախարովան պատասխանեց․
«Մենք աշխատում ենք այդ ուղղությամբ ՝անկախ մյուս ուղղություններով եղած իրավիճակի և զարգացման։ Այդ տարածաշրջանում իրավիճակի կարգավորումը մեզ համար առաջնահերթ է։ Բոլոր կողմերն էլ գիտեն այդ մասին»։
Հարցին, թե ինչպես է վերաբերվում Մոսկվան Ադրբեջանի առաջարկած 5 նախապայմաններին ի պատասխան պաշտոնական Երևանի կողմից ԵԱՀԿ Մինսկի խմբին դիմելուն, Զախարովան ասաց․ «Մենք ողջունում ենք Բաքվի և Երևանի պատրաստակամությունը խաղաղության պայմանագրի նախապատրաստման հարցում։ Եվ վերահաստատում ենք այդ հարցում միջազգային օգնության դիմելու մեր դիրքորոշումը»։
Ինչ վերաբերվում է խաղաղության պայմանագրի ստորագրման հավանական ժամկետներին, Զախարովան ընգծեց, որ դեռ վաղ է խոսել այդ մասին։
