Պատերազմը չէր կարող հետք չթողնել․ Արևիկ Սիմոնյան (տեսանյութ)
Աջակցիր «Ա1+»-ինԿարեն Դեմիրճյանի անվան մարզահամերգային համալիրում «H20» խորագրով ցուցադրության հեղինակը դիզայներ Արևիկ Սիմոնյանն է: Գաղափարի հիմքում, նրա խոսքով, սա ոչ թե զուտ հագուստի ցուցադրություն է, այլ ավելի զգայական։
Ցուցադրության 8 սրահ, յուրաքանչյուրը մի խորագրի ներքո՝ «Երկինք», «Ծնունդ», «Մկրտություն», «Օրհնություն», «Մեղսագործություն», «Ցավ», «Կորուստ», «Դատարկություն»:
«Ցանկացել եմ ցույց տալ ոչ թե պատերազմը, այլ դրա հետևանքը, ունեցած կորուստները: Մենք ցանկացել ենք ցույց տալ մարդու անցնելիք ճանապարհն ու, որ ամեն ինչ կախված է մեր ընտրությունից», - ասում է Արևիկը, ու հավելում՝ «Եվ մենք պետք է ընտրենք բարին, լինենք մեր եկեղեցու, հավատքի կողքին, այդպես կարող ենք շատ մեծ ու լուսավոր ճանապարհ ունենալ»։
44-օրյա պատերազմի մեծ ցավը չէր կարող իր հետքը չթողնել։ Մտածում էր, թե ինչպես կարող է աշխարհին ցույց տալ մեր բազամադարյա մշակույթը: Հավատում, որ նորաձևության միջոցով ևս կարելի է ձայնը լսելի դարձել։
«Եթե ամեն մեկս մեր գործով պայքարենք, ինչ-որ բան կարող ենք փոխել: Մենք հայ ենք, մենք միշտ պայքարելու ենք ու լինելու ենք»։
Ինչու՞ «H20», այսինքն ջուր խորագիր, հարցին, ցուցադրության համակազմակերպիչ Արուսյակ Ստեփանյանը պատասխանում է, որ ջուրն ու մարդն անբաժանելի են։ Ասում է․
«Եվ ցավը և ուրախությունը արցունք են: Մենք կնքվում ենք ջրով, մեր մեջ 70 տոկոսը ջուր է։
Այս ցուցադրությունը Արևիկ Սիմոնյանը ծրագրել է ներկայացնել տարբեր երկրներում, մասնավորապես` Ռուսաստանում և Ամերիկայի Միացյալ Նահանգներում:
